2002-ம் ஆண்டு டெல்லி துக்ளகாபாத் வனப்பகுதியில் கலாம் அன்சாரி என்பவர் கொடூரமாக அடித்துக் கொல்லப்பட்டார். ஃபிரோஜின் சகோதரர் தற்கொலை செய்து கொண்டதற்கு கலாம் அன்சாரியின் குடும்பத்தினரே காரணம் என ஃபிரோஜ் கருதியுள்ளார். இந்தப் பழிவாங்கும் நோக்கத்திலேயே, பீகாரில் இருந்து டெல்லிக்கு வேலை தேடி வந்த அன்சாரியை ஃபிரோஜ் காட்டுப் பகுதிக்கு அழைத்துச் சென்று கல்லால் அடித்துக் கொலை செய்தது காவல்துறை விசாரணையில் தெரியவந்தது.
குற்றம் நிகழ்ந்த உடனேயே அங்கிருந்து தப்பிய ஃபிரோஜ், பீகார் சென்று அன்சாரி குறித்து தவறான தகவல்களைப் பரப்பியுள்ளார். அதன் பிறகு தனது சொந்த ஊருடனான அனைத்து தொடர்புகளையும் துண்டித்துக் கொண்ட அவர், காவல்துறையிடம் சிக்காமல் இருப்பதற்காகத் தனது அடையாளத்தை முழுமையாக மாற்றி தலைமறைவானார். இருபது ஆண்டுகளுக்கும் மேலாகப் பல வெவ்வேறு இடங்களுக்கு இடம்பெயர்ந்து, திருமணம் செய்து கொண்டு தனது கடந்த கால வாழ்க்கையை முற்றிலும் மறைத்து வாழ்ந்து வந்துள்ளார்.
நீண்ட காலமாக நிலுவையில் இருந்த இந்த வழக்கை டெல்லி குற்றப்பிரிவு போலீசார் சமீபத்தில் மீண்டும் விசாரிக்கத் தொடங்கினர். பழைய ஆவணங்கள் மற்றும் புதிய தரவுகளைக் கொண்டு பீகார் உள்ளிட்ட பல இடங்களில் தீவிர தேடுதல் வேட்டை நடத்தினர். இந்தத் தொடர் கண்காணிப்பின் பலனாக, ஹரியானா மாநிலம் குருகிராம் அருகே உள்ள மானேசர் பகுதியில் ஒரு ஆடைத் தொழிற்சாலையில் கடந்த இரண்டு ஆண்டுகளாகத் தையல்காரராகப் பணிபுரிந்து வந்த 48 வயதான ஃபிரோஜ் 24 ஆண்டுகளுக்குப் பிறகு கைது செய்யப்பட்டுள்ளார். அவர் இத்தனை ஆண்டுகள் யாரிடம் தொடர்பில் இருந்தார், எப்படித் தப்பி வாழ்ந்தார் என்பது குறித்த அடுத்தக்கட்ட விசாரணையை போலீசார் தீவிரப்படுத்தியுள்ளனர்.