தமிழகத்தில் சட்டம் ஒழுங்கு சீர்கெட்டுள்ளதாகவும், கடந்த திமுக அரசைப் போலவே தற்போதைய தவெக ஆட்சியிலும் கொலை, கொள்ளை மற்றும் போதைப்பொருள் புழக்கம் அதிகரித்துள்ளதாகவும் கடுமையான விமர்சனங்கள் எழுந்துள்ளன. இந்தச் சூழலை மெய்ப்பிக்கும் வகையில், சென்னை ஐஸ் அவுஸ் பகுதியில் ஒரு கொடூர கொலைச்சம்பவம் அரங்கேறியுள்ளது. அப்பகுதியைச் சேர்ந்த 28 வயதான அஜித் என்ற இளைஞர், தனது வீட்டு வாசலில் தாயுடன் பேசிக்கொண்டிருந்தபோது, இருசக்கர வாகனத்தில் வந்த மர்ம நபர்களால் பயங்கர ஆயுதங்களைக் கொண்டு கொடூரமாக வெட்டிக்கொலை செய்யப்பட்டுள்ளார்.
ரத்த வெள்ளத்தில் சரிந்த அஜித்தை மீட்டு மருத்துவமனைக்குக் கொண்டு சென்றபோதும், அவர் ஏற்கெனவே உயிரிழந்துவிட்டதாக மருத்துவர்கள் உறுதிசெய்தனர். இது குறித்து வழக்குப்பதிவு செய்து விசாரணை மேற்கொண்ட காவல்துறையினர், அப்பகுதியில் நிலவும் கஞ்சா விற்பனைப் போட்டியே இந்தக் கொலைக்குக் காரணம் என்பதைக் கண்டறிந்துள்ளனர். இந்தச் சம்பவம் தொடர்பாக ஹரிஷ் என்ற முக்கியக் குற்றவாளியைக் கைது செய்துள்ள போலீசார், கொலைக்குப் பயன்படுத்தப்பட்ட ஆயுதங்கள் மற்றும் இருசக்கர வாகனத்தைப் பறிமுதல் செய்துள்ளனர். மேலும், தலைமறைவாக உள்ள ராஜேஷ் என்பவரையும், இந்த போதைப்பொருள் விற்பனைப் பின்னணியில் உள்ள மற்ற நபர்களையும் காவல்துறையினர் தீவிரமாகத் தேடி வருகின்றனர்.