புனேவைச் சேர்ந்த 23 வயதான வைஷ்ணவி பிரவீன் ஜாரண்டே என்ற மென்பொருள் பொறியாளர், திருமணமான சில மாதங்களிலேயே தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது. கடந்த மே 9 அன்று ஓம்கார் சஞ்சய் கிசாரே என்பவருடன் இவருக்குத் திருமணம் நடைபெற்றது. இத்திருமணத்திற்காக வைஷ்ணவியின் பெற்றோர் ரூ.45 லட்சம் செலவழித்து, 10 சவரன் தங்க நகைகளையும் சீதனமாகக் கொடுத்துள்ளனர்.
திருமணத்திற்குப் பிறகு பெங்களூருவிலும், பின்னர் புனேவில் உள்ள கணவர் வீட்டிலிருந்தபடியும் வைஷ்ணவி தகவல் தொழில்நுட்ப நிறுவனத்தில் பணியாற்றி வந்தார். இருப்பினும், புதிய கார் ஒன்று வாங்குவதற்காகக் கூடுதல் தொகையாக ரூ.5 லட்சம் கேட்டு, கணவர் ஓம்கார் மற்றும் அவரது பெற்றோர் வைஷ்ணவியை மனரீதியாகவும் உடல்ரீதியாகவும் தொடர்ந்து சித்திரவதை செய்து வந்ததாகக் கூறப்படுகிறது. செப்டம்பர் 24 இரவு, தனது தாயாரைத் தொடர்புகொண்ட வைஷ்ணவி, புகாரகத்தில் தான் எதிர்கொள்ளும் கொடுமைகள் குறித்து அழுது புலம்பியுள்ளார்.
அன்றைய தினமே நள்ளிரவில் வைஷ்ணவி உயிரிழந்த செய்தி அவரது பெற்றோருக்குத் தெரிவிக்கப்பட்டது. இச்சம்பவம் தொடர்பாக வைஷ்ணவியின் தந்தை அளித்த புகாரின் பேரில், அவரது கணவர் மற்றும் மாமனார்-மாமியார் மீது வரதட்சணை தடைச் சட்டம் மற்றும் தற்கொலைக்குத் தூண்டுதல் ஆகிய பிரிவுகளின் கீழ் காவல்துறை வழக்குப் பதிவு செய்துள்ளது. தற்போது இச்சம்பவம் குறித்து தீவிர விசாரணை மேற்கொண்டு வரும் காவல்துறையினர், விசாரணை முடிவிலேயே முழு உண்மையும் தெரியவரும் எனத் தெரிவித்துள்ளனர்.