கன்னியாகுமரி மாவட்டம் நாகர்கோவில் அருகே உள்ள தம்மத்துக்கோணம் விஐபி கார்டன் பகுதியில், பிரபல யூடியூபர் தம்பதியின் வீட்டின் கதவை உடைத்து சுமார் 118 சவரன் தங்க நகைகள் கொள்ளையடிக்கப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது. சமூக வலைதளங்களில் முன்னணி படைப்பாளர்களாக வலம் வரும் இந்த ஜோடியின் வீட்டில் நடந்த துணிகரக் கொள்ளை குறித்து காவல்துறையினர் தீவிர விசாரணை மேற்கொண்டு வருகின்றனர்.
பாதிக்கப்பட்ட வினோத்குமார் மற்றும் மதுமிதா தம்பதியினர் தங்களது அன்றாட குடும்ப வாழ்க்கை மற்றும் பல்வேறு நிகழ்வுகளை யூடியூப் போன்ற சமூக வலைதளப் பக்கங்களில் தொடர்ந்து பதிவிட்டு பிரபலமடைந்தவர்கள் ஆவர். இவர்கள் தங்களது வீடியோக்களில் தங்களிடம் இருந்த நகைகள் மற்றும் பணப்புழக்கத்தை வெளிப்படையாகக் காட்டி வீடியோ வெளியிட்டு வந்ததாகக் கூறப்படுகிறது. இதைக் கண்காணித்த மர்ம நபர்கள், வீட்டில் அதிக அளவிலான தங்க நகைகள் இருப்பதை அறிந்துகொண்டு திட்டமிட்டு இந்தக் கொள்ளைச் சம்பவத்தில் ஈடுபட்டிருக்கலாம் என்ற கோணத்திலும் விசாரணை முடுக்கிவிடப்பட்டுள்ளது.
சம்பவத்தன்று வீட்டில் குடும்பத்தினர் யாரும் இல்லாத நேரத்தைச் சரியாகப் பயன்படுத்திக் கொண்ட கொள்ளையர்கள், வீட்டின் முன்பக்க சோதனைகளைத் தவிர்த்து, பின்புறக் கதவை உடைத்து உள்ளே நுழைந்துள்ளனர். பின்னர் வீட்டில் வைக்கப்பட்டிருந்த சுமார் 118 சவரன் நகைகளைச் சுருட்டிக்கொண்டு தப்பியோடியுள்ளனர். அந்த விஐபி கார்டன் பகுதியில் பல்வேறு இடங்களில் சிசிடிவி கேமராக்கள் பொருத்தப்பட்டிருந்த போதிலும், கொள்ளையர்கள் தந்திரமாக வீட்டின் பின்புற வழியாகச் சென்று தங்களது கைவரிசையைக் காட்டியுள்ளது தெரியவந்துள்ளது.
இச்சம்பவம் குறித்து தகவலறிந்த காவல்துறையினர் உடனடியாகச் சம்பவ இடத்திற்கு விரைந்து சென்று தீவிர விசாரணை மேற்கொண்டனர். கைரேகை நிபுணர்கள் மற்றும் தடயவியல் குழுவினர் வீட்டில் பதிவான தடயங்களைச் சேகரித்து வரும் நிலையில், அப்பகுதியில் பொருத்தப்பட்டுள்ள சிசிடிவி கேமரா காட்சிகளையும் ஆய்வு செய்து வருகின்றனர். தலைமறைவாக உள்ள கொள்ளையர்களைப் பிடிக்க போலிசார் தீவிர நடவடிக்கை எடுத்து வரும் நிலையில், இச்சம்பவம் அப்பகுதி மக்களிடையேயும் சமூக வலைதளப் பயன்பாட்டாளர்களிடையேயும் அதிர்ச்சியையும் எச்சரிக்கையையும் ஏற்படுத்தியுள்ளது.