பஞ்சாப் மாநிலம் லூதியானா மாவட்டத்திலுள்ள பதேகர் குஜ்ரன் கிராமத்தைச் சேர்ந்த 72 வயதான சமன் லால், தீவிர ஞாபக மறதிப் பிரச்சினையால் பாதிக்கப்பட்டவர். சமீபத்தில் அமிர்தசரஸ் பொற்கோயிலுக்குக் குடும்பத்தினருடன் ஆன்மிகப் பயணம் சென்றபோது எதிர்பாராதவிதமாக அவர்களைப் பிரிந்தார். கையடக்கத் தொலைபேசி ஏதும் இல்லாததால் குடும்பத்தாரால் அவரைத் தொடர்பு கொள்ள முடியவில்லை. வழி தெரியாமல் தவித்த சமன் லால், தவறுதலாக ரயிலில் ஏறி சுமார் 1,200 கி.மீ தொலைவிலுள்ள பீகார் மாநிலத்தின் கயா பகுதிக்குச் சென்று சேர்ந்தார். உணவும் இருப்பிடமும் இன்றித் தவித்த அவர், கயாவைச் சேர்ந்த நீரஜ் என்ற இளைஞரிடம் உணவு கேட்டுச் சென்றுள்ளார். முதியவரின் பரிதாப நிலையைக் கண்டு இரக்கப்பட்ட நீரஜ், அவரைத் தனது வீட்டிற்கு அழைத்துச் சென்று ஆதரவளித்தார்.
பஞ்சாபி மொழி மட்டுமே தெரிந்த சமன் லால், தன் கிராமத்தின் பெயரான ‘பதேகர் குஜ்ரன்’ என்பதை மட்டுமே நீரஜிடம் கூறினார். அந்தப் பெயரை வைத்து செயற்கை நுண்ணறிவுத் தொழில்நுட்பமான ‘சாட்ஜிபிடி’ (ChatGPT) உதவியுடன் தேடிய நீரஜ், அக்கிராமம் பஞ்சாபின் லூதியானா மாவட்டத்தில் இருப்பதைத் துல்லியமாகக் கண்டறிந்தார். முதியவரைத் தனியாக அனுப்ப இயலாது என்பதால், தாமே அவருடன் பஞ்சாபிற்குப் பயணம் செய்து அவரது குடும்பத்தைக் கண்டுபிடித்து ஒப்படைத்தார். தொழில்நுட்பத்தின் சாதுரியமான பயன்பாடும், நீரஜின் நெகிழ வைக்கும் மனிதநேயமும் இணைந்து ஒரு குடும்பத்தை மீண்டும் ஒன்றிணைத்த இச்சம்பவம், அக்கிராம மக்கள் அனைவரையும் நெகிழ்ச்சியில் ஆழ்த்தியதுடன், நீரஜுக்கு எல்லையற்ற நன்றியையும் பாராட்டுகளையும் பெற்றுத் தந்துள்ளது.