மதுராந்தகத்தில் நடைபெற்ற தேர்தல் பூத் கமிட்டி உறுப்பினர்கள் கூட்டத்தில் பேசிய அமைச்சர் ஆதவ் அர்ஜுனா, அரசியல் களம் மற்றும் சட்டமன்ற செயல்பாடுகள் குறித்து காரசாரமான கருத்துகளைப் பதிவு செய்தார். தாம் ஒரு அமைச்சராகப் பேசுவதை விடவும், தமிழக வெற்றிக் கழகத்தின் தொண்டனாகப் பேசுவதையே பெரிதும் விரும்புவதாகக் குறிப்பிட்ட அவர், சட்டமன்றத்தில் தாம் பேச முற்படும் போதெல்லாம் ‘ப்ரோட்டோகால்’ எனக் கூறி தன் குரலை ஒடுக்க முயற்சிப்பதாகக் குற்றம் சாட்டினார். மேலும், 75 ஆண்டுகால பாரம்பரியம் பேசும் கட்சிகள் சட்டமன்றத்தின் இறுதியில் மக்கள் பிரச்சினைகளுக்காக தைரியமாக நிற்காமல் விலகிச் செல்வதாகவும் சாடினார்.
வரவிருக்கும் இடைத்தேர்தலில் திமுக டெபாசிட் இழக்கும் எனக் குறிப்பிட்ட அவர், வாக்காளர்களுக்கு பணப்பட்டுவாடா செய்யும் கலாச்சாரத்தைக் கடுமையாகச் சாடினார். கடந்த தேர்தல்களைப் போல இந்த முறையும் தீபாவளிப் பண்டிகையைக் காரணம் காட்டி திமுக ரூ. 5,000 வரை வழங்கி வாக்காளர்களைக் கவர முயலும் எனக் கூறிய அவர், மக்கள் அந்தப் பணத்தைப் பெற்றுக் கொண்டு தவெகவின் ‘விசில்’ சின்னத்திற்கே வாக்களிக்க வேண்டும் எனக் கேட்டுக்கொண்டார். மேலும், தவெக இடைத்தேர்தலில் ஓட்டுக்கு ஒருபோதும் பணம் கொடுக்காது என்றும், பல ஆண்டுகளாகத் தொடரும் இந்த தவறான கலாச்சாரத்தை உடைத்தெறிவதே தவெகவின் நோக்கம் என்றும் உறுதியளித்தார்.
அதிமுக பொதுச்செயலாளர் எடப்பாடி பழனிசாமியின் விமர்சனங்களுக்கு பதிலடி கொடுத்த அவர், தவெகவின் வளர்ச்சி அதிமுகவை அசைத்துப் பார்த்திருப்பதாகத் தெரிவித்தார். எடப்பாடி தொகுதியில் தவெக சார்பில் ஒரு சாதாரண கல்லூரி மாணவியை வேட்பாளராக நிறுத்தினாலே, எடப்பாடி பழனிசாமியை எளிதில் தோற்கடிக்க முடியும் என பகிரங்க சவால் விடுத்தார். தற்போதைய அதிமுக தலைமை தொண்டர்களின் நம்பிக்கையை இழந்துவிட்டதாகவும், சுயநல அரசியலால் அதிமுகவின் பலம் குன்றிவிட்டதாகவும் அவர் கடுமையாக சாடினார்.
கடந்த காலங்களில் அதிமுக பெற்ற வாக்குகள் இரட்டை இலை சின்னத்திற்கு கிடைத்தவையே தவிர, தற்போதைய தலைமைக்கு கிடைத்தவை அல்ல என்று சுட்டிக்காட்டிய அவர், மக்கள் இப்போது உண்மையை உணர்ந்துவிட்டதாகக் கூறினார். மறைந்த தலைவர்களான எம்.ஜி.ஆர் மற்றும் ஜெயலலிதா ஆகியோரின் ஆசியும் தொண்டர்களின் ஆதரவும் தற்போது தவெகவின் ‘விசில்’ சின்னத்தின் பக்கமே உள்ளது எனத் தெரிவித்த அவர், திமுகவை எதிர்த்து அரசியல் செய்யும் ஒரே உண்மையான சக்தி விஜய் தலைமையிலான தமிழக வெற்றிக் கழகம் மட்டுமே என்று கூறி தன் உரையை நிறைவு செய்தார்.
