விநாயகர் சதுர்த்தியை முன்னிட்டு திருச்சி மலைக்கோட்டை உச்சிப் பிள்ளையார், மாணிக்க விநாயகர் மற்றும் தாயுமானவர் சன்னதிகளுக்கு வருகை தந்த அமைச்சர் ரமேஷ், சிறப்புச் சாமி தரிசனம் செய்தார். இதன் பின்னர் செய்தியாளர்களைச் சந்தித்த அவர், தமிழக முதல்வர் விஜய்யின் லண்டன் பயணம் குறித்தும், எதிர்க்கட்சிகள் எழுப்பி வரும் விமர்சனங்கள் குறித்தும் மிகக் காட்டமாகப் பதிலளித்தார். அரசியல் மற்றும் கருத்தியல் ரீதியான கேள்விகளுக்கு மட்டுமே பதில் சொல்ல முடியும் என்றும், வீட்டில் உட்கார்ந்து கொண்டு ஏதேனும் அரசியல் செய்ய வேண்டும் என்பதற்காகப் பேசுபவர்களுக்கெல்லாம் பதில் அளிக்க வேண்டிய அவசியம் இல்லை என்றும் அவர் தெரிவித்தார்.
முதல்வரின் லண்டன் பயணம் குறித்த எதிர்த்தரப்பின் கூச்சல்களுக்குப் பதிலடி கொடுத்த அமைச்சர், “வாய்க்கு வந்ததை எல்லாம் பேசுவதனால்தான் இபிஎஸுக்கு எதிர்க்கட்சி அந்தஸ்து கூட கிடைக்காமல் போயுள்ளது” எனச் சாடினார். முதலமைச்சர் விஜய் தமிழகத்தின் பெருமையை உலக அளவில் கொண்டு சேர்க்கும் வகையில் தெளிவான ஆட்சியை நடத்தி வருவதாகக் குறிப்பிட்ட அவர், நடிகர் அஜித்குமார் பங்கேற்கும் சர்வதேச ரேஸ் பந்தயத்தைத் தொடங்கி வைப்பதற்காகவே முதல்வர் லண்டன் சென்றுள்ளதாகத் தெளிவுபடுத்தினார். உலக அளவில் விளையாட்டு மற்றும் தமிழர்களின் பெருமையை உயர்த்துவதே இந்த விஜயத்தின் முதன்மை நோக்கம் என்றும் விளக்கமளித்தார்.
திமுகவின் போராட்டங்களில் இடம்பெறும் விமர்சனங்கள் குறித்துப் பேசிய அவர், ஜனநாயக முறையில் போராட்டம் நடத்துவதற்கு அனைவருக்கும் உரிமை உண்டு; ஆனால், அவதூறாகவும் ஆபாசமாகவும் பேசுவதை ஏற்க முடியாது என்றார். “ஆபாசமாகவும் இழிவாகவும் பேசுவதுதான் திமுகவின் டி.என்.ஏ. திமுக அமைச்சர்களும், கொளத்தூர் முன்னாள் சட்டமன்ற உறுப்பினரும், அவரது மகன் உதயநிதி ஸ்டாலினும் அப்படித்தான் வளர்க்கப்பட்டிருக்கிறார்கள்” என்று சாடிய அமைச்சர், அமைச்சர்களைக் கொச்சைப்படுத்திப் பேசுவதையே தொழிலாகக் கொண்டிருக்கிறார்கள் எனக் குற்றம்சாட்டினார்.
தமிழக முதல்வர், அமைச்சர்கள் அல்லது பெண்கள் யாரை இழிவாகப் பேசினாலும் சட்டம் தன் கடமையைச் செய்யும் என்றும், முன்னாள் அமைச்சர்கள் பொறுப்புணர்வோடு பேச வேண்டும் என்றும் எச்சரித்தார். குறிப்பாக, முன்னாள் அமைச்சர் சேகர்பாபுவைக் குறிப்பிட்ட அவர், “பேச்சில் அறம் இல்லாத ஒருவர் எவ்வாறு இந்து சமய அறநிலையத்துறை அமைச்சராக இருந்தார்?” எனக் கேள்வி எழுப்பினார். பொதுவெளியில் அவதூறு பரப்புபவர்கள் மீது நிச்சயமாகத் கடுமையான சட்ட நடவடிக்கை எடுக்கப்படும் என்றும் அவர் உறுதியளித்தார்.
தமிழகத்தில் சட்ட ஒழுங்கு சீர்குலைந்துள்ளதாக எடப்பாடி பழனிசாமி வைக்கும் குற்றச்சாட்டுகளுக்குப் பதிலளித்த அமைச்சர், “மழை நின்றாலும் தூவானம் விடாது என்பார்கள்; அதுபோல கடந்த ஆட்சிக்காலத்தில் ஏற்பட்ட சீர்கேடுகளைத் தான் தற்போதுள்ள அரசு சரிசெய்து வருகிறது” என்றார். கடந்த 5 ஆண்டு காலச் செய்தித்தாள்களைப் படிக்காதவர்கள்தான் இதுபோன்ற குற்றச்சாட்டுகளைச் சொல்வார்கள் என்றும், தமிழகத்தில் சட்ட ஒழுங்கைச் சீர்படுத்தி அமைதியை நிலவச் செய்ய முதல்வர் விஜய்யின் தலைமையிலான அரசு அனைத்துத் தீவிர நடவடிக்கைகளையும் எடுத்து வருகிறது என்றும் கூறி தனது பேட்டியை நிறைவு செய்தார்.