நடுரோட்டில் கடுமையான குடிபோதையில் அதிவேகமாக வந்த மெர்சிடிஸ் காரின் ஓட்டுநர், இரண்டு இளைஞர்கள் பயணித்த ஸ்கூட்டர் மீது கொடூரமாக மோதியுள்ளார். இந்த கோர விபத்தில் ஸ்கூட்டரில் சென்ற ஒரு வாலிபர் சம்பவ இடத்திலேயே பரிதாபமாக உயிரிழந்தார்.
விபத்தை ஏற்படுத்திய பயத்தில், போதை ஓட்டுநர் காரை நிறுத்தாமல் அதிவேகமாகத் தப்பிச் செல்ல முயன்றுள்ளார். அப்போது அடிபட்ட ஸ்கூட்டர் காரின் டயருக்குள் சிக்கி, உராய்வு காரணமாகக் கார் திடீரெனப் பிடித்து எரியத் தொடங்கியது. போதை தலைக்கேறிய நிலையில் இருந்த அந்த ஓட்டுநர், கார் எரிவதைக் கூட உணராமல் காரின் உள்ளேயே அமர்ந்திருந்துள்ளார்.
இதைக் கண்டு அதிர்ச்சியடைந்த வழிப்போக்கர்களும் பகுதி மக்களும் விரைந்து வந்து, காரை விட்டு வர மறுத்த போதை ஆசாமியைப் பலவந்தமாக வெளியே இழுத்து உயிருடன் மீட்டனர். அடுத்த சில நிமிடங்களில் மெர்சிடிஸ் காரும் அதனுள் சிக்கியிருந்த ஸ்கூட்டரும் முற்றிலும் எரிந்து சாம்பலாகின. குடிபோதையில் வாகனத்தை ஓட்டி அப்பாவியின் உயிரைப் பறித்த அந்த ஓட்டுநரின் அராஜகச் செயல் சமூக வலைத்தளங்களில் பெரும் கொந்தளிப்பை ஏற்படுத்தியுள்ளது.