உத்தரப் பிரதேச மாநிலம் புலந்த்சஹரில் சமாஜ்வாதி கட்சியின் முன்னாள் எம்.எல்.ஏ குட்டு பண்டிட், தனது மூன்றாவது மனைவியும் காங்கிரஸ் மகளிர் அணி தலைவியுமான அர்ச்சனா பண்டிட்டை முடியைப் பிடித்து இழுத்துத் தாக்கும் அதிர்ச்சி வீடியோ வெளியாகி பரபரப்பை ஏற்படுத்தியுள்ளது. செப்டம்பர் 2 அன்று நடந்த இந்தச் சம்பவத்தை வீட்டில் இருந்த பணிப்பெண் செல்போனில் படம்பிடித்துள்ளார். இச்சம்பவம் தொடர்பாக அர்ச்சனா அளித்த புகாரின் பேரில், வீடியோ ஆதாரத்தை ஆய்வு செய்து காவல்துறை விசாரணை மேற்கொண்டு வருகிறது.
அர்ச்சனா அளித்துள்ள புகாரில், வழக்கு ஒன்றைத் திரும்பப் பெற வலியுறுத்தி குட்டு பண்டிட் மற்றும் அவரது குடும்பத்தினர் தமக்கும் தனது மகனுக்கும் தொடர்ந்து கொலை மிரட்டல் விடுத்து வருவதாகத் தெரிவித்துள்ளார். வீட்டில் நுழைந்து தன்னைத் தாக்கியதாகவும், தங்களுக்கு உடனடியாக 24 மணி நேரப் பாதுகாப்பு வழங்க வேண்டும் என்றும் அவர் கோரியுள்ளார். இருப்பினும், இந்த விவகாரத்தில் இதுவரை முதற்கட்ட தகவல் அறிக்கை பதிவு செய்யப்பட்டுள்ளதா என்பதை காவல்துறை இன்னும் அதிகாரப்பூர்வமாக உறுதிப்படுத்தவில்லை.
https://twitter.com/HateDetectors/status/2096174660274495684/video/1
திபாய் தொகுதியில் இருந்து இரண்டு முறை சட்டமன்ற உறுப்பினராகத் தேர்ந்தெடுக்கப்பட்ட குட்டு பண்டிட் மீது கூறப்பட்டுள்ள இந்த குற்றச்சாட்டுகள் இதுவரை நீதிமன்றத்தில் நிரூபிக்கப்படவில்லை. பல கட்சிகளில் மாறி மாறிப் பணியாற்றிய இவர் மீது நீண்டகாலமாக குடும்பத் தகராறு இருந்து வரும் நிலையில், இந்த வீடியோவின் உண்மைத்தன்மை மற்றும் புகாரின் உண்மை பின்னணி குறித்து புலந்த்சஹர் நகரக் காவல்துறை விரிவான விசாரணை நடத்தி வருகிறது.