கர்நாடக மாநிலம் மங்களூரு பகுதியில் ஆன்லைன் டெலிவரி செயலியான ‘பிலிங்கிட்’ மூலம் வாடிக்கையாளர் ஒருவர் முட்டை ஆர்டர் செய்துள்ளார். டெலிவரி செய்யப்பட்ட முட்டையை உடைத்துப் பார்த்தபோது, அதற்குள் புழுக்கள் நெளிவதைக் கண்டு அதிர்ச்சியடைந்த வாடிக்கையாளர் உடனடியாக இதுகுறித்து உணவுப் பாதுகாப்புத் துறை அதிகாரிகளுக்குப் புகார் அளித்துள்ளார்.
இந்த அதிர்ச்சிச் சம்பவத்தைத் தொடர்ந்து, மங்களூருவில் உள்ள பிலிங்கிட் சேமிப்புக் கிடங்கிற்கு உணவுப் பாதுகாப்புத் துறை அதிகாரிகள் நேரில் சென்று அதிரடி ஆய்வு மேற்கொண்டனர். சோதனையின் போது அங்குச் சுகாதாரமற்ற முறையில் பொருட்கள் சேமித்து வைக்கப்பட்டது தெரியவந்ததையடுத்து, அந்தச் சேமிப்புக் கிடங்கை அதிகாரிகள் உடனடியாகப் பூட்டிச் சீல் வைத்தனர்.
மேலும் கிடங்கை உடனடியாகச் சுத்தம் செய்ய உத்தரவிட்டுள்ள அதிகாரிகள், இந்தச் சுகாதாரச் சீர்கேடு தொடர்பாக உரிய விளக்கம் அளிக்குமாறு பிலிங்கிட் நிர்வாகத்திற்கு நோட்டீஸ் அனுப்பத் தயாராகி வருகின்றனர். விரைவு விநியோகச் செயலியில் வாங்கப்பட்ட உணவுப் பொருளில் புழு இருந்த சம்பவம் பொதுமக்கள் மற்றும் நுகர்வோரிடையே பெரும் அதிர்ச்சியை ஏற்படுத்தியுள்ளது.