மும்பை-நாசிக் நெடுஞ்சாலையில் உள்ள பத்கா பவர் ஹவுஸ் அருகே சென்றுகொண்டிருந்த கண்டெய்னர் லாரியின் மீது, பின்னால் அதிவேகமாக வந்த மற்றொரு லாரி எதிர்பாராதவிதமாக மோதியது. இந்தக் கோர விபத்து அப்பகுதியில் சென்றுகொண்டிருந்த கார் பயணி ஒருவரின் மொபைல் போனில் பதிவாகியுள்ளதுடன், தற்போது அந்த வீடியோ சமூக வலைதளங்களில் வேகமாகப் பரவி வருகிறது.
இந்த பயங்கர மோதலில் லாரியின் முன்பகுதி முழுமையாக நசுங்கியதுடன், ஓட்டுநர் அதில் சிக்கி படுகாயமடைந்தார். மேலும், அவ்வழியாகச் சென்ற மூன்று இருசக்கர வாகனங்கள் மீதும் இந்த லாரி மோதியதில், மோட்டார் சைக்கிள் ஓட்டுநர்களும் காயமடைந்தனர். உடனே உள்ளூர் மக்களும், அவ்வழியாகச் சென்றவர்களும் இணைந்து படுகாயமடைந்த லாரி ஓட்டுநரை மீட்டு கல்யாண் மருத்துவமனைக்கு சிகிச்சைக்காக அனுப்பி வைத்தனர்.
விபத்து பற்றிய தகவல் கிடைத்ததும் விரைந்து வந்த காவல்துறையினர், போக்குவரத்து நெரிசலைச் சீரமைத்து, நெடுஞ்சாலையில் சேதமடைந்து நின்ற வாகனங்களை அப்புறப்படுத்தினர். பத்கா பகுதியில் தொடர்ந்து அதிகரித்து வரும் அதிவேக மற்றும் ஆபத்தான வாகன இயக்கத்தால் விபத்துகள் அதிகரித்து வருவதாகப் பயணிகள் கவலை தெரிவித்து வருவது குறிப்பிடத்தக்கது.