ரவி தேஜா, பிரியா பவானி சங்கர் மற்றும் குழந்தை நட்சத்திரம் பேபி நக்ஷத்ரா ஆகியோரின் நடிப்பில் சமீபத்தில் வெளியாகி மக்கள் மத்தியில் நல்ல வரவேற்பைப் பெற்றுள்ள திரைப்படம் ‘இருமுடி’. ஷிவா நிர்வாணா இயக்கத்திலும், ஜி.வி. பிரகாஷ் குமார் இசையிலும் உருவாகியுள்ள இப்படம், வெளியாகி இரண்டாவது வாரத்திலும் வெற்றிகரமாக ஓடிக்கொண்டிருக்கிறது. மொழி கடந்து நல்ல படங்களை யார் வேண்டுமானாலும் ரசிக்கலாம் என்பதற்கு உதாரணமாக, முன்னணி தமிழ் நடிகரான தனுஷ் இந்தப் படத்தைப் பார்த்துவிட்டு படக்குழுவினர் அனைவரையும் வெகுவாகப் பாராட்டியுள்ளார்.
குறிப்பாக, இப்படத்தில் தன் சிறப்பான நடிப்பை வெளிப்படுத்திய குழந்தை நட்சத்திரமான பேபி நக்ஷத்ராவை வீடியோ கால் மூலம் தொடர்புகொண்டு தனுஷ் பேசியுள்ளார். அப்போது அந்தச் சிறுமியிடம், “நீ மிக அருமையாக நடித்துள்ளாய், எனக்கும் எப்படி இப்படி நடிப்பது என்று சொல்லித்தருவாயா?” என்று தனுஷ் வேடிக்கையாகக் கேட்டுள்ளார். அதற்கு அந்தச் சிறுமியும் எந்தத் தயக்கமும் இன்றி “கண்டிப்பாக சொல்லித்தருகிறேன்” என்று மழலை மாறாமல் க்யூட்டாகப் பதிலளித்துள்ளார். நடிப்பில் சிறந்த கலைஞரான தனுஷ், ஒரு சிறுமியின் திறமையை மனதாரப் பாராட்டிய இந்த வீடியோ உரையாடல் தற்போது சமூக வலைத்தளங்களில் வைரலாகி ரசிகர்களின் மனதை வென்றுள்ளது.