2026 சட்டமன்றத் தேர்தலில் நாம் தமிழர் கட்சி அடைந்த பின்னடைவுக்கு, அக்கட்சியின் தற்போதைய கட்டமைப்பு முறையே முதன்மை காரணம் என்று கட்சியின் அடிமட்டத் தொண்டர்களும் நிர்வாகிகளும் கொதிப்படைந்துள்ளதாகத் தகவல்கள் தெரிவிக்கின்றன. ஒரு சட்டமன்றத் தொகுதியை 10 பகுதிகளாகப் பிரித்து, மாநிலம் முழுவதும் சுமார் 2,300 மாவட்டச் செயலாளர்களை நியமித்த நிர்வாக முறை, அடிமட்டத்தில் பெரும் குழப்பத்தையும் ஒருங்கிணைப்பின்மையையும் உருவாக்கியுள்ளது. மேலும், பொதுச்செயலாளர், பொருளாளர் போன்ற மாநில அளவிலான உயர் பொறுப்புகளில் இருப்பவர்களுக்கே கூட எவ்வித முடிவெடுக்கும் அதிகாரமும் வழங்கப்படவில்லை என்றும், அனைத்து அதிகாரங்களும் ஒரே இடத்தில் குவிந்து கிடந்ததால் தேர்தல் களப்பணிகள் முற்றிலும் முடங்கிப்போனதாகவும் கட்சியினர் வேதனையுடன் கூறுகின்றனர்.
அதிகாரப் பகிர்வு இல்லாத உள்கட்சிப் பூசல்களாலும், தெளிவற்ற கட்டமைப்புச் சிக்கல்களாலும் கட்சிக்குள்ளேயே அதிருப்தி புகையத் தொடங்கியுள்ள நிலையில், தலைமை தன் மீதான தவறுகளை சுட்டிக்காட்ட மறுப்பது தொண்டர்களிடையே மேலும் சலசலப்பை ஏற்படுத்தியுள்ளது. தோல்விக்கான உண்மையான அகக்காரணங்களை ஆராய்ந்து சீரமைக்காமல், தமிழக வெற்றிக் கழகத்தின் வருகையே தங்கள் பின்னடைவுக்குக் காரணம் என மொத்த பழியையும் வெளியார் மீது சுமத்த முயல்வதாக அக்கட்சியின் அதிருப்தியாளர்கள் குற்றம்சாட்டுகின்றனர். கள நிலவரத்தைப் புரிந்து கொண்டு கட்சியின் அதிகாரப் பரவலாக்கத்திலும் கட்டமைப்பு மாற்றத்திலும் உடனடியாகக் கவனம் செலுத்தாவிட்டால், வரும் காலத்தில் கட்சியின் வாக்கு வங்கி மேலும் சரியும் என்ற எச்சரிக்கைக் குரல்களும் நாதகவிற்குள் வலுக்கத் தொடங்கியுள்ளன.