உத்தரப் பிரதேச மாநிலம் கான்பூரில் வாடகை வீட்டில் வசித்து வரும் ரமா தேவி என்ற பெண்மணி, வறுமை மற்றும் குடும்பச் சூழலுக்குப் பயந்து முடங்கிவிடாமல், ‘டோட்டோ’ எனப்படும் மின்சார ஆட்டோவை ஓட்டித் தனது ஒட்டுமொத்தக் குடும்பத்தையும் தனியாளாகக் காப்பாற்றி வருகிறார். விபத்து காரணமாகக் கணவர் கால்கள் பாதிக்கப்பட்டு நடக்க முடியாமல் போன சூழலிலும், 85 வயது முதிய தாய் மற்றும் 4 குழந்தைகளின் பொறுப்பையும் இவர் ஒருவரே ஏற்றுள்ளார்.
தினமும் அதிகாலையில் எழுந்து சமையல் செய்து, குழந்தைகளைப் பள்ளிக்கு அனுப்பி, கணவர் மற்றும் தாயாரைக் கவனித்துக்கொண்ட பின்னரே இவர் ஆட்டோ ஓட்டப் புறப்படுகிறார். குடும்பச் செலவுகள், குழந்தைகளின் கல்வி மற்றும் கணவரின் மருத்துவச் செலவுகளைச் சமாளிக்க, சமீபத்தில் யூடியூப் சேனல் ஒன்றைத் தொடங்கித் தனது அன்றாட உழைப்பைப் பதிவிட்டும் வருமானம் ஈட்டி வருகிறார். எந்தவொரு பின்னணி ஆதரவும் இன்றி, உழைப்பை மட்டுமே மூலதனமாகக் கொண்டு வாழும் ரமா தேவியின் இந்த விடாமுயற்சி மற்றும் தன்னம்பிக்கை, சவால்களை எதிர்கொள்ளும் அனைத்துப் பெண்களுக்கும் ஒரு சிறந்த முன்னுதாரணமாகவும் தூண்டுகோலாகவும் திகழ்கிறது.