நூற்றுக்கணக்கான காலணிகள் குவிந்து கிடக்கும் கூட்ட நெரிசலில், நமக்குரிய ஒரு ஷூவைத் தேடிப்பிடிப்பது பெரும் மனச்சலனத்தைத் தரும் செயலாகும். ஆனால், இந்த எளிய அன்றாடப் பிரச்சனைக்கு ஒருவர் செயற்கை நுண்ணறிவுத் (AI) தொழில்நுட்பத்தைப் பயன்படுத்தி நூதனமான முறையில் தீர்வு கண்டுள்ளார். இன்ஸ்டாகிராமில் சுபாங் போர்க்கர் (Shubhang Borkar) என்பவர் பகிர்ந்த வீடியோவில், ஆயிரத்துக்கும் மேற்பட்ட காலணிகள் குவிந்திருந்த இடத்தில் தொலைந்துபோன தனது க்ளாக்ஸ் (Clog) வகை ஷூவை ஒருவர் ChatGPT உதவியுடன் கண்டெடுத்துள்ள காட்சி இணையவாசிகளின் கவனத்தை ஈர்த்துள்ளது.
https://www.instagram.com/reel/Db8UmyzT_Tg/?utm_source=ig_embed&ig_rid=ArWYEC58whf6H5_7fuv6a8G
அந்த நபர், காலணிகள் குவிந்து கிடந்த பகுதியைப் புகைப்படம் எடுத்து, அதில் தன் இணை ஷூ எங்குள்ளது என்பதைக் கண்டறியுமாறு ChatGPT-யிடம் கேட்டுள்ளார். அந்த AI செயலியும் துல்லியமாக ஷூ இருக்கும் இடத்தைச் சுட்டிக்காட்ட, அவர் அதை எளிதாகக் கண்டெடுத்துள்ளார். தொழில்நுட்பத்தை இவ்வளவு எளிய காரியங்களுக்குப் பயன்படுத்த முடியும் என்பதைப் பார்த்து ஆச்சரியமடைந்த பலர், “நவீன சிக்கல்களுக்கு நவீன தீர்வுகளே தேவை” எனக் கருத்து தெரிவித்து வருகின்றனர். இந்த வீடியோ இணையத்தில் 2 மில்லியனுக்கும் அதிகமான பார்வையாளர்களைக் கடந்து வைரலாகி வருகிறது.
இதேபோன்று மற்றொரு பெண், புத்தகக் கண்காட்சியில் ஆயிரக்கணக்கான புத்தகங்களுக்கு இடையே தமக்குத் தேவையான புத்தகத்தைத் தேடிக் கண்டுபிடிக்க தனது கணவர் ChatGPT-யைப் பயன்படுத்திய சம்பவத்தையும் பகிர்ந்துள்ளார். சிக்கலான குறியீடுகள் எழுதுவதற்கும், கட்டுரைகள் உருவாக்குவதற்கும் பயன்படுத்தப்பட்டு வந்த AI, தற்போது மனிதர்களின் அன்றாட வாழ்வியல் தேவைகளுக்கும், நேரத்தைச் மிச்சப்படுத்துவதற்கும் பயன்படத் தொடங்கியுள்ளது இதன் மூலம் தெளிவாகிறது.
இருப்பினும், இச்சம்பவத்தைக் கிண்டல் செய்யும் விதமாகவும் பல கருத்துகள் குவிந்து வருகின்றன. “ஒரு ஷூவைத் தேடிக் கண்டுபிடிக்கக்கூடவா AI தேவை?” என்றும், “இந்த எளிய வேலைக்காகத் தானா AI உருவாக்கப்பட்டது?” என்றும் நெட்டிசன்கள் நகைச்சுவையாகக் கேள்வி எழுப்பி வருகின்றனர். அதேவேளையில், இந்த காணொளியின் உண்மைத்தன்மை மற்றும் அதன் பின்னணி குறித்து சுயாதீனமாகத் தெளிவுபடுத்தப்படவில்லை என்பதும் குறிப்பிடத்தக்கது.