விழுப்புரம் மாவட்டம் சிந்தாமணி பகுதியைச் சேர்ந்த நண்பர்களான நரேஷ் மற்றும் அருண்குமார் ஆகிய இரு இளைஞர்களும் புறவழிச்சாலையில் நடந்த கோர விபத்தில் பரிதாபமாக உயிரிழந்தனர். இவர்கள் இருவரும் நள்ளிரவில் தேநீர் அருந்திவிட்டு தங்களது இருசக்கர வாகனத்தில் ஊர் திரும்பிக் கொண்டிருந்தனர். அப்போது, முத்தாம்பாளையம் அருகிலுள்ள சாலையில் திடீரென யூ-டர்ன் செய்ய முயன்றபோது, எதிர்பாராத விதமாக பின்னால் அதிவேகமாக வந்த லாரி ஒன்று இவர்களின் பைக்கின் மீது பயங்கரமாக மோதி விபத்துக்குள்ளானது.
இந்த கொடூர விபத்தில் தூக்கி வீசப்பட்டு படுகாயமடைந்த நரேஷ் சம்பவ இடத்திலேயே ரத்த வெள்ளத்தில் உயிரிழந்தார். உயிருக்கு போராடிய அருண்குமாரை மீட்டு முண்டியம்பாக்கம் அரசு மருத்துவமனைக்கு அவசர அவசரமாகக் கொண்டு செல்லும் வழியில் அவரும் மரணமடைந்தார். இது குறித்து தகவலறிந்த விழுப்புரம் தாலுகா காவல்துறையினர், இருவரின் உடல்களையும் கைப்பற்றி உடற்கூறு ஆய்விற்காக அனுப்பி வைத்துள்ளனர். மேலும், விபத்தை ஏற்படுத்திய லாரி ஓட்டுநர் மீது வழக்குப்பதிவு செய்து போலீசார் தீவிர விசாரணை மேற்கொண்டு வருகின்றனர்.