மகாராஷ்டிராவின் கல்யாண் பகுதியில் உள்ள கோவிந்த்வாடி பைபாஸ் சாலையில், சச்சின் ஷெண்ட்கே என்ற டாக்ஸி ஓட்டுநரிடம் இரண்டு பெண்கள் நூதன முறையில் பணம் பறிக்க முயன்ற அதிர்ச்சியூட்டும் சம்பவம் நடந்துள்ளது. பிவண்டி செல்ல வேண்டும் எனக் கூறிய அந்தப் பெண்கள், ஓட்டுநர் ‘கோன்’ கிராமம் வரை மட்டுமே செல்வதாகத் தெரிவித்தபோதிலும் வலுக்கட்டாயமாக டாக்ஸியில் ஏறியுள்ளனர். வாகனம் சிறிது தூரம் சென்றதும், ஓட்டுநரிடம் பத்தாயிரம் ரூபாய் கேட்டு மிரட்டத் தொடங்கியுள்ளனர். அவர் பணம் தர மறுத்ததால், தங்களது ஆடைகளைத் தாங்களே கிழித்துக்கொண்டு அவர் மீது பொய்யான பாலியல் வன்கொடுமை புகார் அளிக்கப்போவதாகக் கூறி அச்சுறுத்தியுள்ளனர்.
பெண்களின் இந்த மிரட்டலுக்குச் சற்றும் அஞ்சாத ஓட்டுநர் ஷெண்ட்கே, அவர்களுக்குப் பணம் கொடுக்க மறுத்ததோடு உடனடியாக காவல்துறையினரின் உதவியை நாடினார். அத்துடன் தனது டாக்ஸியை நேராகக் காவல் நிலையத்தை நோக்கிச் செலுத்தத் தொடங்கினார். இந்தச் சம்பவத்தின்போது டாக்ஸிக்குள் நடந்த களேபரங்கள் அடங்கிய வீடியோ தற்போது சமூக வலைத்தளங்களில் வெளியாகி வைரலாகி வருகிறது. அந்த வீடியோவில், பெண்கள் ஓட்டுநரைத் தகாத வார்த்தைகளால் திட்டுவதும், வண்டியின் கதவைத் திறக்கக் கூறிச் சத்தமிடுவதும், அவரைத் தாக்க முற்படுவதும் தெளிவாகப் பதிவாகியுள்ளது. அதேசமயம், அவர்களைக் காவல் நிலையத்திற்கே கொண்டு செல்வதாக ஓட்டுநர் எச்சரிப்பதும் அதில் கேட்கிறது.
டாக்ஸி துர்காடி பாலத்தைக் கடந்து சென்றுகொண்டிருந்தபோது, சாலையில் வந்த காவல் துறையின் வாகனத்தை அந்தப் பெண்கள் பார்த்துள்ளனர். காவல்துறையிடம் சிக்கிக்கொள்வோம் என்ற பயத்தில், ஓடிக்கொண்டிருந்த டாக்ஸியிலிருந்து அவர்கள் அவசர அவசரமாகக் கீழே குதித்துத் தப்பியோடிவிட்டனர். ஓட்டுநர்களைக் குறிவைத்து நடைபெறும் இதுபோன்ற மிரட்டல் மற்றும் பணப்பறிப்புச் சம்பவங்கள் வாகன ஓட்டிகளிடையே பெரும் கவலையை ஏற்படுத்தியுள்ளது. தப்பியோடிய அந்தப் பெண்கள் மீது அதிகாரப்பூர்வமாகக் காவல் நிலையத்தில் புகார் அளிக்கப்பட்டு நடவடிக்கை எடுக்கப்பட்டதா என்பது குறித்த உறுதியான தகவல்கள் இதுவரை வெளியாகவில்லை.