கிரேட்டர் நொய்டா வெஸ்ட் பகுதியில் அமைந்துள்ள ஹெரிடேஜ் ஹோம்ஸ் குடியிருப்பில், திடீரென மின்சாரம் துண்டிக்கப்பட்டதால் 5 வயது சிறுமி ஒருவர் தனது வீட்டு வேலைக்காரப் பெண்ணுடன் லிஃப்ட்டிற்குள் சிக்கிக் கொண்டார். மின்சாரம் இல்லாததால் லிஃப்ட் முற்றிலும் இருண்டு, கடுமையான வெப்பம் நிலவிய சூழலில், அச்சிறுமி பயத்தால் கதறி அழுதுள்ளார். ஆபத்துக்கான அவசர அலாரம் ஒலிக்கப்பட்ட போதிலும், நீண்ட நேரமாக மீட்பு உதவிகள் எதுவும் வராததால் குடியிருப்பு வளாகத்தில் பெரும் பரபரப்பும் பதற்றமும் நிலவியது.
வெளியே நின்று கொண்டிருந்த பெற்றோர், உள்ளே தங்கள் பிஞ்சு மகள் பயத்தில் அலறும் குரலைக் கேட்டு ஒன்றும் செய்ய முடியாமல் கதறித் துடித்தனர். சுமார் ஒரு மணி நேரப் போராட்டத்திற்குப் பிறகு, லிஃப்ட்டின் கதவுகள் பலவந்தமாக உடைக்கப்பட்டு சிறுமியும் வேலைக்காரப் பெண்ணும் பத்திரமாக வெளியே மீட்கப்பட்டனர். நீண்ட நேரப் போராட்டத்தால் உடல்நலம் பாதிக்கப்பட்ட சிறுமி உடனடியாக சிகிச்சைக்காக அருகில் உள்ள மருத்துவமனையில் அனுமதிக்கப்பட்டார். குடியிருப்பு நிர்வாகத்தின் இந்த அலட்சியப்போக்கு அப்பகுதி மக்களிடையே பெரும் அதிர்ச்சியை ஏற்படுத்தியுள்ளது.