தேர்தல் பின்னடைவுகளுக்குப் பின் உட்கட்சி அமைப்புகளைக் களையெடுத்துச் சீரமைப்பது எந்தவொரு அரசியல் இயக்கத்திற்கும் இன்றியமையாத ஒன்றாகும். கள ஆய்வுக் குழுவின் அறிக்கைகள் வந்த பிறகும் தவறிழைத்த நிர்வாகிகள் மீது நடவடிக்கை எடுக்கத் தயங்குவது, கட்சித் தொண்டர்களின் உழைப்பையும் நம்பிக்கையையும் வெகுவாகப் பாதிக்கும்.
“ஒருவரை நீக்கினால் அவர் வேறு கட்சிக்குச் சென்றுவிடுவாரோ” என்ற அச்சம் மேலோங்கினால், உட்கட்சி ஒழுங்கையும் தலைமையின் அதிகாரத்தையும் நிலைநாட்டுவது சாத்தியமில்லாமல் போய்விடும். சுயநல நிர்வாகிகளை விடவும், களத்தில் உண்மையாக உழைக்கும் தொண்டர்களையும் அடுத்தகட்ட இளைஞர் தலைமுறையையும் முன்னிறுத்தி, தயக்கமின்றி துணிச்சலான மாற்றங்களைச் செய்வதே திமுக தலைவர் ஸ்டாலினுக்கும் கட்சிக்கும் நீண்டகால அடிப்படையில் வலுவூட்டும்.