காவிரி நீர் உரிமைப் பிரச்சினையில் முதலமைச்சர் விஜய் தனியாக கர்நாடகாவுக்குச் சென்று பேச்சுவார்த்தை நடத்த முயன்ற நடவடிக்கை, தமிழ்நாட்டு அரசியலில் பெரும் புயலைக் கிளப்பியுள்ளது. சட்டப்பேரவையில் இது குறித்துப் பேசிய முதல்வர் விஜய், காவிரி உரிமைக்காக கர்நாடகா செல்ல தானாகவே முன்னெடுப்பு எடுத்ததாகவும், தமிழ்நாட்டு மக்களின் நன்மைகளுக்காக எந்தவித அவமானத்தையும் தாங்கிக்கொள்ளத் தயாராக இருப்பதாகவும் தெரிவித்திருந்தார். இருப்பினும், இந்தத் திட்டம் குறித்த எந்தவொரு அதிகாரப்பூர்வ அறிவிப்பும் தமிழக அரசிடமிருந்து வராத நிலையில், கர்நாடக முதல்வர் டி.கே. சிவக்குமார் இதனைப் பகிரங்கமாகத் தெரிவித்த பின்னரே விஜய்யின் இந்த மறைமுக நகர்வு வெளிச்சத்திற்கு வந்தது.
இந்த விவகாரத்தை மையமாக வைத்து, திமுகவின் அதிகாரப்பூர்வ நாளேடான ‘முரசொலி’ தனது தலையங்கத்தில் கடும் விமர்சனங்களைக் முன்வைத்துள்ளது. “கர்நாடக அரசிடம் நேரில் சென்று பேசினால், அவர்கள் பார்த்த மயக்கத்தில் உடனே தண்ணீரைத் திறந்து விடுவார்கள்; அதைத் தமிழக மக்கள் மாபெரும் சாதனையாகக் கொண்டாடுவார்கள் என்று முதல்வர் விஜய் கனவு கண்டார்” என விமர்சித்துள்ள முரசொலி, அது நிறைவேறாததால் தற்போது சட்டப்பேரவையில் சோக நாடகம் ஆடுவதாகக் குற்றம்சாட்டியுள்ளது. மேலும், எதிர்க்கட்சித் தலைவர் மு.க. ஸ்டாலின் மற்றும் பல்வேறு விவசாய அமைப்புகள் முதலிலேயே எச்சரித்தும், அதைப் பொருட்படுத்தாமல் விஜய் பிடிவாதம் காட்டியதாகவும் சுட்டிக்காட்டியுள்ளது.
கர்நாடக முதல்வரிடம் பேசிய உண்மை விவரங்களைத் தமிழ்நாட்டு மக்களுக்குத் தெரிவிக்காமல் விஜய் மறைத்துவிட்டதாகவும் முரசொலி சாடியுள்ளது. தமிழ்நாட்டின் முதன்மையான வாழ்வாதாரப் பிரச்சினை குறித்துப் பக்கத்து மாநில முதல்வருடன் நடந்த பேச்சுவார்த்தையை மூடி மறைத்ததும், டி.கே. சிவக்குமார் உண்மையைப் போய்ப் பேசிய பிறகும் தமிழக அரசு எவ்வித விளக்கமும் அளிக்காததும் ஏற்றுக்கொள்ள முடியாத ஒன்று என்று கேள்வி எழுப்பியுள்ளது. தமிழ்நாட்டில் மட்டுமல்லாது கர்நாடகாவிலும் பல்வேறு கன்னட அமைப்புகள் இதற்கு எதிராகக் கொந்தளித்து, அவர் அம்மாநிலத்திற்குள் நுழையத் தடை கோரியதையும் தலையங்கம் நினைவூட்டியுள்ளது.
இறுதியாக, அடுக்கடுக்கான கேள்விகளை முன்வைத்து முரசொலி நாளேடு விஜய்யைக் கடுமையாகச் சாடியுள்ளது. முதலில் பேச்சுவார்த்தைக்கு அழைப்பு விடுத்துவிட்டுப் பின்னர் ‘வர வேண்டாம்’ என கர்நாடக முதல்வர் மறுத்தது, கன்னட அமைப்புகளின் தீவிர எதிர்ப்பு, விஜய்யின் உருவப்பொம்மைகள் எரிக்கப்பட்டது, அவருடைய ‘ஜனநாயகன்’ பட விளம்பரப் பலகைகள் கிழிக்கப்பட்டு திரையரங்கக் காட்சிகள் ரத்து செய்யப்பட்டது எனத் தொடர்ந்து நேர்ந்த அவமானங்களைச் சுட்டிக்காட்டியுள்ளது. “இவ்வளவு அவமானங்களைச் சந்தித்த பிறகும், தமிழ்நாட்டு மக்களுக்காகத் தான் இதைத் தாங்குவதாகக் கூறுவதற்கு வெட்கமாக இல்லையா?” என்று கேள்வி எழுப்பித் தனது கண்டனத்தைப் பதிவு செய்துள்ளது.