மத்திய பிரதேச மாநிலம் ஜபல்பூரில், சக தொழிலாளியின் குழந்தையைக் கடத்த முயன்ற பெண் ஒருவரை காவல்துறையினர் ரயில் நிலையத்தில் வைத்து அதிரடியாகக் கைது செய்தனர். ஜபல்பூருக்குக் கூலி வேலைக்காக வந்த மண்டலா மாவட்டத்தைச் சேர்ந்த அப்பெண், அங்கு மற்றொரு பெண் தொழிலாளியுடன் நட்பு வளர்த்துக் கொண்டுள்ளார். பின்னர், அவர்களின் நம்பிக்கையைப் பயன்படுத்தி அக்குழந்தையை யாருக்கும் தெரியாமல் கடத்திச் சென்றுள்ளார்.
குழந்தையைக் காணாமல் அதிர்ச்சியடைந்த பெற்றோர் உடனடியாக கௌரிகாட் காவல் நிலையத்தில் புகார் அளித்தனர். புகாரின்பேரில் விரைந்து செயல்பட்ட காவல்துறையினர், அப்பகுதியில் இருந்த சிசிடிவி (CCTV) காட்சிகளை ஆய்வு செய்தனர். அதில், அப்பெண் தன் முகத்தை மூடியபடி குழந்தையைத் தூக்கிக்கொண்டு வேகமாக ஓடும் காட்சிகள் பதிவாகியிருந்தன. சமூக வலைதளங்களிலும் வைரலான இந்தச் சிசிடிவி பதிவை அடிப்படையாகக் கொண்டு காவல்துறையினர் தீவிர விசாரணை மேற்கொண்டனர்.
விசாரணையில், கடத்தப்பட்ட குழந்தையை அப்பெண் ரயில் மூலம் தனது சொந்த ஊரான மண்டலாவுக்குக் கொண்டு செல்லத் திட்டமிட்டிருந்தது தெரியவந்தது. உடனடியாக ஜபல்பூர் ரயில் நிலையத்தை முற்றுகையிட்ட காவல்துறையினர், அப்பெண் ரயிலில் ஏறுவதற்கு முன்பாகவே அவரை மடக்கிப் பிடித்து குழந்தையைப் பத்திரமாக மீட்டனர். ஜபல்பூர் நகரக் காவல் கண்காணிப்பாளர் எம்.டி. நகோதியா தலைமையில் சிறப்பாகச் செயல்பட்டு குழந்தையைக் மீட்ட காவல்துறையினரை அனைவரும் பாராட்டி வரும் நிலையில், இச்சம்பவம் குறித்துத் தொடர் விசாரணை நடைபெற்று வருகிறது.