தமிழக வெற்றிக் கழகத்தின் தலைமையில் முதல்முறையாக ஆட்சி அமைந்திருக்கும் நிலையில், தற்போது நடைபெற்று வரும் சட்டமன்றக் கூட்டத்தொடர் அரசியல் களத்தில் பெரும் சுவாரஸ்யத்தை ஏற்படுத்தியுள்ளது. முதலமைச்சர் விஜய் தலைமையிலான இந்த அமைச்சரவையில் அனைவரும் முற்றிலும் புதிய முகங்களாகப் பொறுப்பேற்றுள்ளனர். “ஊழலற்ற வெளிப்படைத் தன்மையான ஆட்சி” என்பதையே தனது முதன்மைக் கோட்பாடாகக் கொண்டுள்ள முதலமைச்சர், தனது அமைச்சரவை சகாவும் அதே வழியில் செல்ல வேண்டும் எனத் திட்டவட்டமாக அறிவுறுத்தியுள்ளார். இருப்பினும், சில அமைச்சர்களின் செயல்பாடுகள் தொடர்பாக பல்வேறு தரப்பிலிருந்தும் தொடர்ச்சியாகக் குற்றச்சாட்டுகள் எழுந்தவண்ணம் உள்ளன.
இந்தச் சூழலில், அமைச்சர்கள், அவர்களின் உதவியாளர்கள் மற்றும் அவர்களுக்கு நெருக்கமானவர்களின் செயல்பாடுகள் குறித்து உளவுத்துறை மூலமாக விரிவான அறிக்கை ஒன்றை முதலமைச்சர் விஜய் பெற்றுள்ளதாகத் தகவல்கள் கசிகின்றன. தற்போதைய 33 அமைச்சர்களில் வெறும் 9 பேரின் செயல்பாடுகள் மட்டுமே முதலமைச்சருக்குத் திருப்தி அளிக்கும் வகையில் உள்ளதாகவும், மற்ற அமைச்சர்களின் செயல்பாடுகள் அரசுக்கு அவப்பெயரை ஏற்படுத்தும் விதமாகவே அமைந்திருப்பதாகவும் அந்த அறிக்கையில் குறிப்பிடப்பட்டுள்ளதாகக் கூறப்படுகிறது. ஏற்கனவே சில எம்.எல்.ஏ-க்கள் தொடர்பாக வெளியான தகவல்களால் அதிருப்தியில் இருந்த விஜய்க்கு, இந்த உளவுத்துறை அறிக்கை மேலும் பெரும் அதிர்ச்சியை ஏற்படுத்தியுள்ளது.
ஒருபுறம் கூட்டணி கட்சிகளின் மறைமுகக் நெருக்கடிகள், மறுபுறம் சொந்தக் கட்சி அமைச்சர்களின் சுணக்கமான செயல்பாடுகள் என இரட்டைச் சவால்களை முதலமைச்சர் எதிர்கொண்டு வருகிறார். இந்தச் சிக்கல்களுக்கு முற்றுப்புள்ளி வைக்கும் வகையில், தற்போது நடைபெற்று வரும் பட்ஜெட் கூட்டத்தொடர் நிறைவடைந்தவுடன் அமைச்சரவையில் அதிரடி மாற்றங்களைச் செய்ய விஜய் திட்டமிட்டுள்ளதாகத் தெரிகிறது. திருப்திகரமாகச் செயல்படாத அமைச்சர்களை நீக்கிவிட்டு, திறமையான புதிய சட்டமன்ற உறுப்பினர்களுக்கு வாய்ப்பளிக்க ஏதுவாக, அவர்களின் செயல்பாடுகள் குறித்த அறிக்கைகளையும் அதிகாரிகளிடம் அவர் கோரியுள்ளார்.
முதலமைச்சரின் இந்த அதிரடித் திட்டத்தை உணர்ந்துகொண்ட அதிருப்திப் பட்டியலில் உள்ள அமைச்சர்கள், தங்கள் பதவியைத் தக்கவைத்துக்கொள்ளும் தீவிர முயற்சியில் இறங்கியுள்ளனர். முதலமைச்சருக்கு நெருக்கமான நட்பு வட்டாரங்கள் மற்றும் முக்கியப் புள்ளிகள் மூலமாகத் தங்களின் நற்பெயரை மீட்டெடுக்க அவர்கள் காய் நகர்த்தி வருகின்றனர். எது எப்படியோ, பட்ஜெட் கூட்டத்தொடருக்குப் பிறகு தமிழக அமைச்சரவையில் மிகப்பெரிய அளவிலான மாற்றம் இருக்கும் என்பதும், தவறு செய்பவர்கள் யாராக இருந்தாலும் விஜய் தயங்கமாட்டார் என்பதும் கோட்டை வட்டாரத்தில் பெரும் பரப்பரப்பை உருவாக்கியுள்ளது.