தமிழகத்தில் சமீபத்தில் நடந்து முடிந்த சட்டசபைத் தேர்தல் முடிவுகளுக்குப் பிறகு, அதிமுகவில் உட்கட்சி மோதல்களும் தலைமை மீதான அதிருப்திகளும் தொடர்ந்து புயலைக் கிளப்பி வந்தன. தேர்தலுக்குப் பிந்தைய பின்னடைவு மற்றும் கட்சியின் அதிகாரப் போட்டி காரணமாக மூத்த தலைவர்களான எஸ்.பி. வேலுமணி, தங்கமணி மற்றும் சி.வி. சண்முகம் போன்றோர் கட்சி நிகழ்வுகளில் இருந்து தள்ளிப்போயிருந்தனர். குறிப்பாக, நாமக்கல் மாவட்டச் செயலாளர் பதவியில் இருந்து நீக்கப்பட்ட முன்னாள் அமைச்சர் தங்கமணி, தனக்கு வழங்கப்பட்ட கழக அமைப்புச் செயலாளர் பதவியையும் ராஜினாமா செய்து கடிதம் அனுப்பியது அதிமுக வட்டாரத்தில் பெரும் பரபரப்பை ஏற்படுத்தியது.
கடந்த அதிமுக ஆட்சிக் காலத்தில் எடப்பாடி பழனிசாமிக்கு மிக முக்கியத் தூணாகவும், கொங்கு மண்டலத்தில் அவருக்கு ஏற்பட்ட சவால்களைச் சமாளிக்கும் முதன்மை கரங்களாகவும் செயல்பட்டவர்கள் தங்கமணியும் வேலுமணியும் தான். இத்தகைய மூத்த தலைவர் எடப்பாடியுடன் அதிருப்தியில் இருந்தது கட்சியின் எதிர்காலம் குறித்த கேள்விகளை அதிகரித்த நிலையில், தற்போது இந்த மோதலுக்கு ஒரு முற்றுப்புள்ளி வைக்கும் வகையில் புதிய நகர்வுகள் வெளிவரத் தொடங்கியுள்ளன.
சுதந்திரப் போராட்ட வீரர் தீரன் சின்னமலையின் நினைவு நாளை முன்னிட்டு, சங்ககிரியில் உள்ள அவரது நினைவிடத்தில் அதிமுக சார்பில் மரியாதை செலுத்தப்படும் என்று பொதுச்செயலாளர் எடப்பாடி பழனிசாமி அறிக்கை வெளியிட்டிருந்தார். அந்த அறிக்கையில், முன்னாள் அமைச்சர் தங்கமணி தலைமையில் அதிமுக நிர்வாகிகள் இந்நிகழ்வில் பங்கேற்பார்கள் எனக் குறிப்பிடப்பட்டிருந்தது. தலைமை வெளியிட்ட இந்த அறிவிப்பை ஏற்று, நாளைய தினம் தங்கமணி தனது ஆதரவாளர்களுடன் சென்று தீரன் சின்னமலை நினைவிடத்தில் மரியாதை செலுத்த உள்ளார்.
மாவட்டச் செயலாளர் பதவியை மீண்டும் வழங்குவதாக எடப்பாடி பழனிசாமி அளித்த உறுதியின் பேரில் தான் தங்கமணி இந்த நிகழ்வில் பங்கேற்க ஒப்புக் கொண்டதாக அவரது ஆதரவாளர்கள் தெரிவிக்கின்றனர். இந்த சமரச முயற்சியின் மூலம் எடப்பாடி பழனிசாமிக்கும் தங்கமணிக்கும் இடையே நிலவி வந்த விரிசல் முடிவுக்கு வந்துள்ளதாகவும், கொங்கு மண்டலத்தில் அதிமுக மீண்டும் தனது பலத்தை ஒருங்கிணைக்கத் தொடங்கியுள்ளதாகவும் கட்சி வட்டாரங்கள் உறுதியாக நம்புகின்றன.