திருவண்ணாமலை மாவட்டம் ஆரணியில் உள்ள அரசுப் பள்ளியில், 8-ஆம் வகுப்பு மாணவிக்கு ஆசிரியை ஒருவர் ‘நல்ல தொடுதல் மற்றும் கெட்ட தொடுதல்’ குறித்த விழிப்புணர்வு வகுப்பை நடத்தியுள்ளார். அப்போது, ஏதேனும் தவறான சம்பவங்கள் நடந்திருந்தால் பயப்படாமல் தன்னிடம் கூறுமாறு ஆசிரியை நம்பிக்கை அளித்துள்ளார். வகுப்பிற்குப் பிறகு, 13 வயது மாணவி ஒருவர் கண்ணீருடன் ஆசிரியையை அணுகி, தனக்கு நேர்ந்த கொடுமையைக் கூறியுள்ளார்.
கடந்த 2021-ஆம் ஆண்டு, அம்மாணவி 3-ஆம் வகுப்பு (8 வயது) படித்துக்கொண்டிருந்தபோது, பள்ளி அருகே விளையாடிக்கொண்டிருந்த அவரை ஒரு நபர் பலவந்தமாகத் தன் வீட்டிற்கு இழுத்துச் சென்று பாலியல் அத்துமீறலில் ஈடுபட்டுள்ளார். மேலும், இதை வெளியில் சொன்னால் கொலை செய்துவிடுவேன் என மிரட்டியதால், பயத்தின் காரணமாக மாணவி 5 ஆண்டுகளாக இச்சம்பவத்தை வெளியில் சொல்லாமல் தவித்து வந்துள்ளார்.
இதைக் கேட்டு அதிர்ச்சியடைந்த ஆசிரியை, மாணவியின் தாயாரை வரவழைத்து விவரத்தைக் கூறி, ஆரணி அனைத்து மகளிர் காவல் நிலையத்தில் புகார் அளிக்கச் செய்தார். விசாரணையில், இக்கொடூரச் செயலில் ஈடுபட்டது கொசப்பாளையத்தைச் சேர்ந்த கூலித்தொழிலாளி ஐயப்பன் (42) என்பது தெரியவந்தது. அவரைப் போக்சோ சட்டத்தின்கீழ் கைது செய்த காவல்துறையினர், வேலூர் மத்திய சிறையில் அடைத்தனர். ஆசிரியையின் விழிப்புணர்வால் 5 ஆண்டுகளுக்குப் பிறகு குற்றவாளி தண்டிக்கப்பட்ட இச்சம்பவம் பெரும் பரபரப்பை ஏற்படுத்தியுள்ளது.