மிஸோரம் மாநிலத்தில் கல்வித் துறை சீர்திருத்தங்கள் மற்றும் தேர்வு வெளிப்படைத்தன்மையை வலியுறுத்தி நடைபெற்ற போராட்டத்தில், நூற்றுக்கணக்கான இளைஞர்கள் ஒன்றாகக் கூடி ‘3 இடியட்ஸ்’ திரைப்படத்தின் ‘கிவ் மீ சம் சன்ஷைன்’ என்ற பாடலைப் பாடி அமைதியான முறையில் தங்கள் எதிர்ப்பைப் பதிவு செய்துள்ளனர். ஆவேசமான கோஷங்களை எழுப்புவதற்குப் பதிலாக பாடலின் மூலம் மன அழுத்தத்தையும் மாணவர்களின் போராட்டத்தையும் வெளிப்படுத்திய இந்த நெகிழ்ச்சியான வீடியோ இணையத்தில் வைரலாகி அனைவரின் கவனத்தையும் ஈர்த்துள்ளது.
கல்வி அமைப்பில் நிலவும் மன உளைச்சலையும் எதிர்பார்ப்புகளையும் உணர்த்தும் இந்தப் பாடல் தேர்வு முறைக்கு எதிராக நாடு முழுவதும் குரல் கொடுத்து வரும் மாணவர்களுக்கு இடையே பெரும் பிணைப்பை ஏற்படுத்தியுள்ளது. வன்முறையோ அல்லது மோதலோ இன்றி ஒற்றுமையை வலியுறுத்தி இசை வடிவில் நடத்தப்பட்ட இந்த அமைதிப் போராட்டம், இணையவாசிகளின் பாராட்டுகளைப் பெற்றுள்ளதுடன் தேசிய அளவில் கவனத்தை ஈர்த்துள்ளது.