மாம்பாக்கம் ஊராட்சி மன்றத் தலைவரும், தமிழக வெற்றிக் கழகத்தின் (தவெக) செங்கல்பட்டு கிழக்கு மாவட்ட இணை செயலாளருமான என்.வீரா (எ) வீராசாமி, ஒப்பந்ததாரர் ஒருவரிடம் ரூ.1.30 லட்சம் லஞ்சம் வாங்கியதாகக் கூறப்படும் வீடியோ சமூக வலைத்தளங்களில் பரவி பெரும் சர்ச்சையை ஏற்படுத்தியது. இந்த விவகாரம் கட்சி வட்டாரத்தில் அதிர்வலைகளை உருவாக்கிய நிலையில், தவெக தலைவர் விஜய் உடனடியாகச் செயல்பட்டு, அவரை கட்சியின் அடிப்படை உறுப்பினர் பதவியிலிருந்தே அதிரடியாக நீக்கி உத்தரவிட்டுள்ளார். இச்சம்பவம் குறித்து மூத்த பத்திரிகையாளர் சேகுவேரா ‘ஜென்டில்மேன்’ யூடியூப் சேனலில் வழங்கிய பேட்டி, தற்போதைய அரசியல் சூழலில் உற்றுநோக்கத்தக்க விவாதங்களை எழுப்பியுள்ளது.
இச்சம்பவத்தை 90-களில் வாஜ்பாய் அமைச்சரவையில் பாஜக தலைவராக இருந்த பங்காரு லட்சுமணன் ரகசிய கேமராவில் லஞ்சம் வாங்கி கையும் களவுமாகப் பிடிபட்ட சம்பவத்தோடு ஒப்பிட்டுப் பேசியுள்ளார் பத்திரிகையாளர் சேகுவேரா. தவெக தலைவர் விஜய், உளவுத்துறை அதிகாரிகள் மூலம் இந்த லஞ்சப் புகாரின் உண்மைத்தன்மையை உறுதி செய்த பின்னரே இந்த அதிரடி முடிவை எடுத்துள்ளார். திமுக உள்ளிட்ட பிற பாரம்பரிய கட்சிகளில் இதுபோன்ற புகார்கள் எழுந்தால், சம்பந்தப்பட்டவர்கள் தற்காலிகமாக சஸ்பெண்ட் செய்யப்படுவது அல்லது கட்சிப் பொறுப்புகளில் இருந்து மட்டுமே விடுவிக்கப்படுவது வழக்கம். ஆனால், விஜய் பிற கட்சிகளைப் போல இழுத்தடிக்காமல், முன்னாள் முதல்வர் ஜெயலலிதா பாணியில் மிகக் கடுமையான மற்றும் வேகமான நடவடிக்கையை மேற்கொண்டுள்ளார்.
விஜய்யின் இந்த அதிரடி நடவடிக்கை அவரது நேர்மையையும் கோபத்தையும் காட்டினாலும், அவரைச் சுற்றியுள்ள இரண்டாம் கட்டத் தலைவர்களின் செயல்பாடுகள் குறித்தும் எச்சரிக்க வேண்டியுள்ளது என்று சேகுவேரா சுட்டிக்காட்டியுள்ளார். கட்சித் தலைவர் நேர்மையாக இருந்தாலும், கீழ்மட்ட மற்றும் மாவட்ட அளவிலான நிர்வாகிகள் தவறு செய்யும்போது, அது ‘மிஸ்டர் கிளீன்’ என்ற விஜய்யின் தனிப்பட்ட நற்பெயருக்குப் பெரும் களங்கத்தை ஏற்படுத்திவிடும். எனவே, தவறு செய்பவர்கள் யாராக இருந்தாலும் அவர்களை உடனுக்குடன் கண்டறிந்து, லஞ்ச ஒழிப்புத்துறையின் மூலம் கைது நடவடிக்கைக்கு உட்படுத்துவது மட்டுமே கட்சியின் எதிர்காலத்திற்குப் பலம் சேர்க்கும்.
மக்களின் வாக்குகள் என்பது அமைச்சர்களையோ அல்லது மற்ற நிர்வாகிகளையோ நம்பிப் போடப்பட்டவை அல்ல, அவை “விஜய்” என்ற ஒற்றை பிம்பத்திற்காக மட்டுமே அளிக்கப்பட்டவை என்பதை தவெகவினர் உணர வேண்டும். தற்போதைய அமைச்சரவையில் உள்ள பலருக்கு இந்த நீக்கம் ஒரு பெரிய எச்சரிக்கையையும் பயத்தையும் உருவாக்கியுள்ளது என்பதில் சந்தேகமில்லை. விஜய் தற்போதுதான் அரசியலை முழுமையாக உள்வாங்கி, தன்னைச் சுற்றியுள்ளவர்கள் யார் என்பதைப் புரிந்து கொள்ளத் தொடங்கியிருக்கிறார்; இந்த தூய்மைப்படுத்தும் நடவடிக்கைகள் தொடர்ந்தால் மட்டுமே தவெக ஆட்சி ஆரோக்கியமான பாதையில் பயணிக்கும் என்று பத்திரிகையாளர் சேகுவேரா தனது பேட்டியில் அழுத்தமாகப் பதிவு செய்துள்ளார்.