கேரள மாநிலம் திருவனந்தபுரத்தைச் சேர்ந்த இளம்பெண் ஒருவர், வேலை தேடும் நோக்கில் புதுச்சேரி கிருமாம்பாக்கத்தில் உள்ள ஒரு தனியார் பொறியியல் நிறுவனத்தின் உரிமையாளரான லட்சுமிகாந்தன் என்பவரைத் தொலைபேசி வாயிலாக அண்மையில் அணுகியுள்ளார். அந்த நபரும் அப்பெண்ணிற்குத் தனது நிறுவனத்தில் ‘தனிச் செயலாளர்’ பணி வழங்குவதாகவும், அதற்கு மாதந்தோறும் ஒரு லட்சம் ரூபாய் ஊதியம் தருவதாகவும் ஆசைவார்த்தை கூறியுள்ளார். இதனை நம்பி கடந்த மே மாதம் புதுச்சேரிக்கு வந்த அந்தப் பெண்ணைக் கிருமாம்பாக்கம் பகுதியிலுள்ள ஓர் அடுக்குமாடி குடியிருப்பில் தங்க வைத்துள்ளார்.
அதன்பின்னர், அவசரத் தேவை எனக் கூறி அந்தப் பெண்ணிடமிருந்து ஐந்து லட்சம் ரூபாயைப் பெற்றுக் கொண்ட லட்சுமிகாந்தன், ஜூன் முதல் வாரத்தில் போதை தலைக்கேறிய நிலையில் பெண்ணின் அறைக்குள் அத்துமீறி நுழைந்து அவரைப் பாலியல் வன்கொடுமை செய்துள்ளார். இந்தத் துயரச் சம்பவம் குறித்துப் பாதிக்கப்பட்ட பெண் அளித்த புகாரின் பேரில், கிருமாம்பாக்கம் போலீசார் நான்கு கடுமையான பிரிவுகளின் கீழ் வழக்குப் பதிவு செய்து, கடலூர் மாவட்டத்தைச் சேர்ந்த தொழிலதிபர் லட்சுமிகாந்தனை அதிரடியாகக் கைது செய்து சிறையில் அடைத்தனர்.