மாற்றுக்கட்சியிலிருந்து தமிழக வெற்றிக் கழகத்தில் இணையும் மூத்த தலைவர்களின் முதிர்ச்சியற்ற பேட்டிகளால், தவெக அரசுக்கும் முதல்வர் விஜய்க்கும் அடுத்தடுத்து சட்ட ரீதியாகவும் அரசியல் ரீதியாகவும் பெரும் தலைவலிகள் ஏற்பட்டு வருகின்றன. அண்மையில் திமுக கூட்டணியில் இருந்து வெளியேறி தவெகவில் இணைந்த மதிமுக பொதுச்செயலாளர் வைகோ, “மதிமுக எம்.எல்.ஏ.க்களை ராஜினாமா செய்யச் சொல்லுங்கள், அவர்கள் மீண்டும் போட்டியிடும் போது நானே பிரச்சாரம் செய்கிறேன் என விஜய் என்னிடம் கூறினார்” என்று செய்தியாளர்களிடம் பேசி சர்ச்சையைக் கிளப்பினார். இது தவெக அரசின் ‘குதிரை பேரத்தை’ உறுதி செய்கிறது என திமுக, அதிமுக, பாஜக ஆகிய எதிர்க்கட்சிகள் ஆளுநரிடம் புகார் அளிக்கும் அளவிற்கு விவகாரம் விஸ்வரூபம் எடுத்தது. பின்னர் ஆலோசகர்கள் மூலம் விஜய்யின் வருத்தம் தெரிவிக்கப்படவே, “நான் தான் அப்படி சொன்னேன், முதல்வர் அப்படி கேட்கவில்லை” என்று வைகோ பல்டி அடித்தார்.
இந்த சர்ச்சை ஓய்வதற்குள், அதிமுகவிலிருந்து விலகி தவெகவில் இணைந்த முன்னாள் அமைச்சர் எம்.ஆர். விஜயபாஸ்கரின் பேட்டி அடுத்த இடியாக இறங்கியுள்ளது. “தவெகவில் அழைத்தார்கள், அதனால் நாங்கள் இணைந்தோம்” என்று அவர் குறிப்பிட்டது, எதிர்க்கட்சிகளுக்கு மீண்டும் ஒரு வலுவான ஒப்புதல் வாக்குமூலமாக அமைந்துவிட்டது. சாதாரண அரசியல்வாதிகள் அல்லாமல், மக்கள் மத்தியில் செல்வாக்குமிக்க ஆளுமைகள் இவ்வாறு பேசுவது சட்ட ரீதியாக தவெக அரசுக்கு நெருக்கடியை ஏற்படுத்தும் என்பதை உணர்ந்த திமுக, இந்த விவகாரத்திலும் ஆளுநரைச் சந்தித்து குதிரை பேரம் தொடர்பாக நடவடிக்கை எடுக்குமாறு புதிய புகாரை அளித்துள்ளது.
ஏற்கனவே வைகோவின் பேட்டி மற்றும் அதிமுக எம்.எல்.ஏ.க்கள் தவெகவில் இணைந்தது தொடர்பாக தமிழக ஆளுநர் மாளிகை விஜய் அரசிடம் விளக்கம் கேட்டுள்ள நிலையில், தற்போது விஜயபாஸ்கரின் பேட்டி குறித்தும் விளக்கம் கேட்டுள்ளதாக கோட்டை வட்டாரங்கள் தெரிவிக்கின்றன. இந்த விவகாரம் முதல்வர் விஜய்யின் கவனத்திற்குச் சென்றதும், அவர் தனது ஆலோசகர்களிடம் கடும் கோபத்தை வெளிப்படுத்தியுள்ளார். “கட்சிக்கு வருகிறவர்கள் எல்லாம் ஏன் இப்படி விவரம் தெரியாமல் உளறுகிறார்கள்? இவர்களின் பேச்சால் தவெக அரசுக்கு சட்ட சிக்கல் வரும் என்பது கூடவா இவர்களுக்குத் தெரியாது?” என்று கடுகடுத்துள்ளார்.
முதல்வர் விஜய்யின் இந்த உச்சக்கட்ட கோபம் ஆலோசகர்கள் மூலம் உடனடியாக எம்.ஆர். விஜயபாஸ்கருக்குக் கடத்தப்பட்டது. இதன் விளைவாக, “எனது பேட்டி தவறாகப் புரிந்துகொள்ளப்பட்டுள்ளது; அதிமுக தலைமை மீதுள்ள அதிருப்தியால் நாங்களாக எடுத்த முடிவு தான் இது, யாருடைய அழுத்தமும் இல்லை” என்று அவரும் நேற்று அவசர அவசரமாக பல்டி அடித்து விளக்கமளித்துள்ளார். ஏற்கனவே பல்வேறு நிர்வாகப் பஞ்சாயத்துகளில் தத்தளித்துக் கொண்டிருக்கும் முதல்வர் விஜய்க்கு, கட்சியில் இணையும் மூத்த தலைவர்களின் இத்தகைய பொறுப்பற்ற பேட்டிகள் டென்ஷனை மேலும் அதிகரித்துள்ளதாக கோட்டை வட்டாரங்கள் முணுமுணுக்கின்றன.