கடந்த 2026 தமிழக சட்டமன்றத் தேர்தலில் தனித்துப் போட்டியிட்டு 108 தொகுதிகளில் வென்ற தமிழக வெற்றிக் கழகம் , தற்போது கூட்டணி ஆதரவோடு ஆட்சியைப் பிடித்துள்ளது. விஜய் முதல்வராகப் பொறுப்பேற்ற பிறகு, தமிழக அரசியலில் பெரும் மாற்றங்கள் நிகழ்ந்து வருகின்றன. குறிப்பாக, பிரசாரத்தின் போது அதிமுகவை ஒரு பொருட்டாக மதிக்காத விஜய், தேர்தலுக்குப் பிறகு அக்கட்சியின் முன்னாள் அமைச்சர்கள், எம்.எல்.ஏ.க்கள் மற்றும் முக்கிய நிர்வாகிகளைத் தன் பக்கம் இழுத்து வருகிறார். சில அதிமுக எம்.எல்.ஏ.க்கள் தங்கள் பதவிகளை ராஜினாமா செய்துவிட்டு தவெகவில் இணைந்தது எடப்பாடி பழனிச்சாமி தரப்புக்கு அதிர்ச்சியை ஏற்படுத்தியுள்ளது.
அதிமுகவிலிருந்து விலகி தவெகவில் இணையும் நிர்வாகிகள் சேவை மனப்பான்மையோடு வரவில்லை என்றும், விரைவில் வரவிருக்கும் உள்ளாட்சித் தேர்தலில் கவுன்சிலர், மேயர் போன்ற பொறுப்புகளை குறிவைத்தே வருவதாகவும் கூறப்படுகிறது. இதற்குத் தேவையான பொருளாதார வலிமையும் தனிப்பட்ட செல்வாக்கும் அவர்களிடம் உள்ளதால், தங்களுக்கு வாய்ப்பு மறுக்கப்படுமோ என்ற அச்சம் தவெகவின் பழைய நிர்வாகிகளிடம் எழுந்துள்ளது. விஜய் மக்கள் இயக்க காலத்திலிருந்தே பல ஆண்டுகளாகக் கட்சிக்காக உழைத்த தங்களின் உழைப்பு வீணாகிவிடுமோ என்ற கவலையில் அவர்கள் உள்ளனர்.
எம்.ஆர். விஜயபாஸ்கர், சி. விஜயபாஸ்கர் போன்ற அதிமுக முக்கியப் புள்ளிகளுக்கு மாவட்டச் செயலாளர் பதவி வழங்கப்படலாம் என்ற பேச்சால் தவெகவின் தற்போதைய மாவட்டச் செயலாளர்கள் கலக்கத்தில் உள்ளனர். இந்நிலையில், கட்சியின் பொதுச்செயலாளர் புஸ்ஸி ஆனந்த், “புதிதாக வருபவர்களைப் புறக்கணிக்க மாட்டோம்” என்று கூறியது பழைய நிர்வாகிகளுக்கு அதிர்ச்சியை அதிகரித்துள்ளது. அவர்கள் நேரில் முறையிட்டபோது, “உங்களையும் கைவிடமாட்டோம், அவர்களையும் கைவிடமாட்டோம்” என்று அவர் மழுப்பலாகப் பதிலளித்துள்ளார். மாற்றுக்கட்சியினரை இணைப்பது தவெகவின் பலத்தை அதிகரித்தாலும், ஆரம்பகால நிர்வாகிகளின் அதிருப்தியைக் கட்சித் தலைமை அலட்சியப்படுத்தக் கூடாது என்பதே அரசியல் நோக்கர்களின் கருத்தாக உள்ளது.