ஷாக்… தமிழகத்தில் மீண்டும் கொரோனா அச்சமா..? உயிரிழப்புகள் குறித்த பரபரப்பு தகவல்கள்…! சுகாதாரத்துறை வெளியிட்ட அதிரடி விளக்கம்…!

ஆந்திர மாநிலத்தைச் சேர்ந்த இருவர் கோவிட்-19 தொற்றால் உயிரிழந்ததாகப் பரவிய தகவலை அடுத்து, பொதுமக்களின் அச்சத்தைப் போக்கும் வகையில் பொது சுகாதாரத்துறை விரிவான விளக்கம் அளித்துள்ளது. உயிரிழந்த 52 வயது நபர் நுரையீரல் சார்ந்த தீவிர சுவாசக் கோளாறினாலும், மற்றொரு 68 வயது நபர் தீவிர இதய நோய் பாதிப்பாலும் உயிரிழந்துள்ளனர் என்பதும், இவர்களுக்குக் கோவிட்-19 தொற்று தற்செயலாக மட்டுமே கண்டறியப்பட்டது என்பதும் தெரியவந்துள்ளது. மேலும், கடலூர் மாவட்டத்தைச் சேர்ந்த 46 வயது நபர் ஒருவரும் கோவிட்-19 சிகிச்சையில் இருந்தபோது உயிரிழந்துள்ள நிலையில், தமிழக அரசு ஆந்திர சுகாதாரத்துறையுடன் இணைந்து மருத்துவ விவரங்களைத் தொடர்ந்து கண்காணித்து வருகிறது.

தமிழகத்தில் ஒருங்கிணைந்த நோய் கண்காணிப்புத் திட்டத்தின் கீழ் இந்தத் தொற்று வழக்கமான முறையில் கண்காணிக்கப்பட்டு வருகிறது. அறுவை சிகிச்சைக்கு முந்தைய கட்டாயப் பரிசோதனைகள் மற்றும் தீவிர சுவாசப் பிரச்சனை உள்ளவர்களுக்கு மேற்கொள்ளப்படும் சோதனைகள் மூலமே இத்தொற்று கண்டறியப்படுகிறது. கடந்த 2024-ல் 990 பேரும், 2025-ல் 1,250 பேரும், 2026-ல் தற்போது வரை 335 பேரும் என மொத்தம் 2,575 பாதிப்புகள் பதிவாகியுள்ளன; இவை வழக்கமான கண்காணிப்பால் கண்டறியப்பட்டவையே தவிர, புதிய நோய் பரவலால் ஏற்பட்டவை அல்ல. தேசிய வைராலஜி நிறுவனத்தின் மரபணு பரிசோதனை முடிவுகள், தற்போதுள்ள வைரஸ் லேசான பாதிப்பையே கொண்டிருப்பதை உறுதி செய்துள்ளன.

எனவே, பொதுமக்கள் தேவையற்ற அச்சமோ பதற்றமோ அடைய வேண்டாம் என்றும், வதந்திகளை நம்பாமல் அதிகாரப்பூர்வ தகவல்களை மட்டுமே பின்பற்றுமாறும் சுகாதாரத்துறை கேட்டுக்கொண்டுள்ளது. காய்ச்சல், இருமல், தொண்டை வலி போன்ற அறிகுறிகள் இருந்தால் உடனடியாக அரசு மருத்துவமனையை அணுகவும், முதியவர்கள் மற்றும் நீண்டகால உடல்நலப் பாதிப்பு உள்ளவர்கள் கூடுதல் கவனத்துடன் இருக்கவும் அறிவுறுத்தப்பட்டுள்ளது. தமிழகத்தில் தீவிரமான கொரோனா வைரஸ் வகை பரவுவதற்கு எவ்வித ஆதாரமும் இல்லை என்றும், தனிநபர் சுகாதாரத்தைப் பின்பற்றி விழிப்புடன் இருக்குமாறும் அரசு உறுதி அளித்துள்ளது.