தமிழக அரசியலை தற்போது இடைத்தேர்தல் காய்ச்சல் முழுமையாகப் பற்றிக்கொண்டுள்ளது. அண்மையில் நடந்து முடிந்த சட்டமன்றத் தேர்தலில் யாரும் எதிர்பாராத திருப்பமாக, நடிகர் விஜய்யின் தமிழக வெற்றிக் கழகம் ஆட்சிக்கட்டிலில் அமர்ந்தது. இருப்பினும், தவெக 107 இடங்களை மட்டுமே பெற்று, கூட்டணிக் கட்சிகளின் ஆதரவோடு ஒரு சிறுபான்மை அரசாகவே தற்போதைக்கு ஆட்சியை நடத்தி வருகிறது. தவெகவின் இந்த பலவீனத்தைத் தங்களுக்குச் சாதகமாகப் பயன்படுத்தி, தற்போதைய ஆட்சியை வீழ்த்துவதற்குக் திமுக தரப்பு ஒரு ரகசிய மாஸ்டர் பிளானை தீட்டி வருவதாக அறிவாலய வட்டாரங்கள் தெரிவிக்கின்றன.
தற்போதைய நிலவரப்படி, தமிழக சட்டமன்றத்தில் மொத்தம் 7 தொகுதிகள் காலியாக உள்ளன. தவெக தலைவர் விஜய் தான் போட்டியிட்டு வெற்றி பெற்ற இரண்டு தொகுதிகளில், திருச்சி கிழக்கு தொகுதியை ராஜினாமா செய்ததால் அந்த இடம் காலியானது. இதுமட்டுமின்றி, அதிமுகவின் உட்கட்சிப் பூசலால் அக்கட்சியைச் சேர்ந்த 6 எம்.எல்.ஏக்கள் தங்களது பதவிகளை அதிரடியாக ராஜினாமா செய்துவிட்டு ஆளும்கட்சியான தவெகவில் இணைந்தனர். மேலும் சில அதிமுக மூத்த தலைவர்கள் தவெகவில் இணையக்கூடும் என்பதால், விரைவில் 10-க்கும் மேற்பட்ட இடங்களில் இடைத்தேர்தல் வரலாம் என்று எதிர்பார்க்கப்படுகிறது. இந்த இடைத்தேர்தல்களில் வென்று எப்படியாவது 118 என்ற மேஜிக் நம்பரைத் தொட்டு, தனிப்பெரும்பான்மை பெற்றுவிட வேண்டும் என்பதே முதல்வர் விஜய்யின் திட்டமாக உள்ளது.
ஆனால், தவெகவின் இந்த கணக்குகளுக்கு முட்டுக்கட்டை போட திமுக மிகக் கடுமையான வியூகங்களை வகுத்துள்ளது. தவெக அரசு முழுமையாக ஆட்சி செய்யக் கூடாது என்பதில் உறுதியாக இருக்கும் திமுக தலைமை, காலியாக உள்ள அனைத்துத் தொகுதிகளிலும் தனது முழு பலத்தையும் இறக்கி வெற்றி பெறத் திட்டமிட்டுள்ளது. தவெக அரசுக்கு வெளியில் இருந்து ஆதரவளிக்கும் கூட்டணிக் கட்சிகளுக்குள் இருக்கும் அதிருப்தியைப் பயன்படுத்தி, சட்டசபைக்குள் திமுகவின் பலத்தை அதிகரிப்பதுதான் இவர்களின் முதல் இலக்கு. இந்த இடைத்தேர்தல் வெற்றிகள் மூலம் திமுக நேரடியாக ஆட்சி அமைக்க முடியாது என்றாலும், தவெகவின் பலத்தைக் குறைத்து ஆட்சியை நிலைகுலைய வைக்க முடியும் என நம்புகிறது.
சுருக்கமாகச் சொன்னால், இடைத்தேர்தல் வெற்றிகள் மூலம் தவெகவை தனிப் பெரும்பான்மை பெறவிடாமல் தடுத்து, பின்னர் நம்பிக்கையில்லா தீர்மானம் கொண்டு வந்து விஜய்யின் ஆட்சியைக் கவிழ்ப்பதுதான் திமுகவின் இறுதி இலக்கு. அதன் பின் தற்காலிக அரசு அமைக்க முயலாமல், நேரடியாக மாநிலத்திற்குப் பொதுத்தேர்தலைக் கொண்டு வர திமுக வியூகம் அமைத்துள்ளது. திமுகவின் இந்த அதிரடி ‘ஆபரேஷன் பை எலக்சன்’ நடவடிக்கை தவெக அரசுக்கு பெரும் நெருக்கடியை ஏற்படுத்தியுள்ள நிலையில், இந்த வாழ்வா சாவா போராட்டத்தை முறியடிக்க முதல்வர் விஜய்யும் தனது ஆலோசகர்களுடன் கோட்டையில் தீவிர ஆலோசனையில் ஈடுபட்டுள்ளார்.