ஃபிஃபா உலகக்கோப்பை கால்பந்து தொடரின் ரவுண்ட் ஆஃப் 16 சுற்றில், பிரான்ஸ் மற்றும் பராகுவே அணிகளுக்கு இடையே நடைபெற்ற ஆட்டம் மைதானத்தில் பெரும் பரபரப்பை ஏற்படுத்தியுள்ளது. இப்போட்டியின் முதல் பாதியில் இரு அணிகளும் கோல் அடிக்க தீவிரமாக முயன்றும் பலன் கிடைக்கவில்லை. தொடர்ந்து ஆட்டத்தின் 70வது நிமிடத்தில் பிரான்ஸ் அணியின் டெசிரே டூயே ஃபவுல் செய்யப்பட்டதால், அந்த அணிக்கு பெனால்டி வாய்ப்பு கிடைத்தது. இதனைச் சரியாகப் பயன்படுத்திய பிரான்ஸ் கேப்டன் கிலியன் எம்பாப்பே, உலகக்கோப்பை வரலாற்றில் தனது 19-வது கோலை பதிவு செய்து, பிரான்ஸ் அணியை 1-0 என்ற கணக்கில் வெற்றி பெறச் செய்தார்.
போட்டி முடிந்த பிறகு, எம்பாப்பே தனது அணியின் வீரர்களுடனும் ரசிகர்களுடனும் வெற்றியை மிகவும் ஆக்ரோஷமாகக் கொண்டாடினார். அப்போது பராகுவே அணியின் கோல்கீப்பர் ஒர்லாண்டோ கில், எம்பாப்பேயைப் பாராட்டுவதற்காக கைகுலுக்கத் தனது கையை நீட்டினார். ஆனால், எம்பாப்பே அங்கிருந்த கோல்கீப்பரை முற்றிலும் புறக்கணித்துவிட்டு, அவரைக் கண்டு கொள்ளாமலேயே கடந்து சென்றார். இந்தச் செயல் மைதானத்தில் பெரும் விவாதத்தை ஏற்படுத்தியது.
இதனால் கடும் அவமதிப்புக்குள்ளான கோல்கீப்பர் ஒர்லாண்டோ கில், ஆத்திரத்தில் தன்னிடம் இருந்த கால்பந்தை எம்பாப்பேயின் முதுகை நோக்கி எறிந்து தனது கோபத்தை வெளிப்படுத்தினார். எம்பாப்பே இதைப் பெரிதாகக் கண்டுகொள்ளவில்லை என்றாலும், மைதானத்தில் இருந்த இரு அணி வீரர்களுக்கிடையே திடீரென உரசலும் மோதலும் வெடித்தது. நிலைமை மோசமானதைத் தொடர்ந்து, நடுவர்களும் சக வீரர்களும் உடனடியாக தலையிட்டு இரு தரப்பினரையும் சமாதானம் செய்ய வேண்டிய சூழல் ஏற்பட்டது.
இச்சம்பவம் குறித்துப் பேசிய கோல்கீப்பர் ஒர்லாண்டோ கில், “நான் அவரைப் பாராட்டத்தான் கையை நீட்டினேன், ஆனால் அவர் நான் அங்கே இல்லாதது போலவே என்னைக் கடந்து சென்றார்; அந்த ஏமாற்றத்தில் ஏற்பட்ட கோபத்தில்தான் பந்தை எறிந்தேன்” என விளக்கமளித்தார். மறுபுறம் பராகுவே அணியின் முரட்டுத்தனமான ஆட்டத்தைக் கிண்டல் செய்த எம்பாப்பே, “நாங்கள் மைதானத்திற்குச் சொகுசாக விளையாட வருவோம் என்று நினைத்தார்கள் போல; எங்களால் அழுக்கான, முரட்டுத்தனமான கால்பந்தையும் விளையாடி வெல்ல முடியும் என்பதை நிரூபித்துள்ளோம்” என்று ஆக்ரோஷமாகப் பதிலடி கொடுத்துள்ளார்.