தமிழக முதலமைச்சரின் “தாயுமானவர் திட்டத்தின்” கீழ், 65 வயதிற்கு மேற்பட்ட மூத்த குடிமக்கள் மற்றும் மாற்றுத்திறனாளிகளின் இல்லங்களுக்கே நேரடியாகச் சென்று ரேஷன் பொருட்கள் விநியோகம் செய்யப்பட்டு வருகின்றன. இதன் தொடர்ச்சியாக, சென்னை மண்டல கூட்டுறவுத் துறையின் கீழ் செயல்படும் நியாயவிலைக் கடைகள் மூலம் தகுதியான பயனாளிகளின் வீடுகளுக்கே சென்று அத்தியாவசியப் பொருட்களை வழங்க உத்தரவிடப்பட்டுள்ளது. இச்சேவை வரும் ஜூலை மாதம் 4 மற்றும் 6 ஆகிய தேதிகளில் சென்னை மண்டலத்திற்கு உட்பட்ட 18 மண்டலங்களில் உள்ள தகுதியான பயனாளிகளுக்கு வழங்கப்பட உள்ளது.
இந்த வீடு தேடி வழங்கும் சேவையானது அண்ணாநகர், ஆலந்தூர், பெருங்குடி, சோழிங்கநல்லூர், தேனாம்பேட்டை, அடையாறு, திருவொற்றியூர், மணலி, மாதவரம், தண்டையார்பேட்டை, ராயபுரம், திரு.வி.க. நகர், அம்பத்தூர், கோடம்பாக்கம், வளசரவாக்கம், பல்லாவரம், குரோம்பேட்டை மற்றும் தாம்பரம் ஆகிய 18 மண்டலங்களில் செயல்படுத்தப்படவுள்ளது. இப்பகுதிகளில் உள்ள 990 நியாயவிலைக் கடைகளின் விற்பனையாளர்கள் அத்தியாவசியப் பொருட்களைப் பயனாளிகளின் இல்லங்களுக்கேச் சென்று நேரடியாக விநியோகம் செய்வார்கள் என சென்னை மண்டல கூட்டுறவுச் சங்கங்களின் கூடுதல் பதிவாளர் பாபு தெரிவித்துள்ளார். எனவே, இத்திட்டத்தின் கீழ் பயன்பெறும் முதியோர்களும் மாற்றுத்திறனாளிகளும் இந்த நல்வாய்ப்பைத் தவறாமல் பயன்படுத்திக் கொள்ளுமாறு அரசு கேட்டுக்கொண்டுள்ளது.