குஜராத் மாநிலம் ஜுனாகத் பகுதியில் பெய்து வரும் கனமழையால் சாலைகளில் வெள்ளநீர் தேங்கியுள்ளது. இந்நிலையில், தம்பதியர் இருவர் தங்களது மோட்டார் சைக்கிளில் மழையில் நனைந்தபடி சாலையைக் கடக்க முயன்றனர். அப்போது, தேங்கியிருந்த மழைநீருக்கு அடியில் ஆழமான பள்ளம் ஒன்று மறைந்திருப்பது தெரியாமல், ஓட்டுநர் வண்டியை அதன் மீது இயக்கியுள்ளார். எதிர்பாராதவிதமாக பைக் சக்கரம் பள்ளத்தில் சிக்கியதில், நிலைதடுமாறிய தம்பதியினர் இருவரும் சாலையில் தூக்கி வீசப்பட்டு படுகாயமடைந்தனர். இந்த விபத்தின் சிசிடிவி காட்சிகள் இணையத்தில் வெளியாகி பெரும் அதிர்ச்சியை ஏற்படுத்தியுள்ளது.
இந்த கோர விபத்தில் மோட்டார் சைக்கிளை ஓட்டி வந்த நபர், தரையில் தல பலமாக மோதியதால் எழ முடியாமல் தவித்தார். அவருடன் பின்னால் அமர்ந்து வந்த பெண், லேசான காயங்களுடன் தப்பித்து அந்த நபரை தூக்க முயன்றார். இதைக் கண்ட அங்கிருந்த பொதுமக்கள் மற்றும் வழிப்போக்கர்கள் உடனடியாக ஓடிவந்து, படுகாயமடைந்த பைக்கரை மீட்டு சிகிச்சைக்காக மருத்துவமனையில் அனுமதித்தனர். இந்தியாவில் ஒவ்வொரு பருவமழைக் காலத்திலும், இது போன்ற நீர் தேங்கிய சாலைகளும், அதற்குள் மறைந்திருக்கும் பள்ளங்களும் வாகன ஓட்டிகளின் உயிரைப் பறிக்கும் பெரும் அச்சுறுத்தலாக மாறி வருகின்றன.
https://twitter.com/DixitGujarat/status/2072603040142754168/video/1
இந்த விபத்து ஒருபுறமிருக்க, சம்பவ இடத்தில் பதிவான மற்றொரு காட்சி பொதுமக்களிடையே பெரும் கொந்தளிப்பை ஏற்படுத்தியுள்ளது. விபத்து நடந்த அதே தருணத்தில், அவசர உதவிக்கான ‘112’ காவல் ரோந்து வாகனம் ஒன்று அந்தப் பாதையைக் கடந்து சென்றது. சாலையில் இருவர் அடிபட்டு கிடப்பதைக் கண்டும், அந்த வாகனம் உதவ முன்வராமல் அப்படியே கடந்து சென்றது சமூக ஊடகங்களில் கடுமையான விமர்சனத்திற்கு உள்ளாகியுள்ளது. பொதுமக்களின் பாதுகாப்பிற்குப் பொறுப்பான அவசர கால மீட்பு வாகனமே இவ்வாறு அலட்சியமாகச் சென்றது ஏன் என்று இணையவாசிகள் பலரும் கேள்வி எழுப்பி தங்களது கண்டனங்களை அரசிடம் பதிவு செய்து வருகின்றனர்.
இந்தச் சம்பவம் மோசமான சாலைப் பராமரிப்பு மற்றும் குடிமை அதிகாரிகளின் பொறுப்பற்ற தனத்தை மீண்டும் வெளிச்சத்திற்கு கொண்டு வந்துள்ளது. அதே வேளையில், பருவமழைக் காலங்களில் இருசக்கர வாகன ஓட்டிகள் அனைவரும் கட்டாயம் தலைக்கவசம் அணிய வேண்டும் என்றும், வேகத்தைக் குறைத்து பாதுகாப்பான முறையில் வாகனங்களை இயக்க வேண்டும் என்றும் சமூக ஆர்வலர்கள் வலியுறுத்துகின்றனர். சாலைகளில் மறைந்திருக்கும் இத்தகைய ஆபத்துகளைக் களைய, அரசு நிர்வாகம் உடனடியாக போர்க்கால அடிப்படையில் நடவடிக்கை எடுக்க வேண்டும் என்பதே ஒட்டுமொத்த மக்களின் கோரிக்கையாக உள்ளது.