வார்த்தைகள் தேவையில்லை… ஒரு புன்னகையால்… இணையத்தை நெகிழ வைத்த.. மாற்றுத்திறனாளி இண்டிகோ ஊழியரின் வைரல் காட்சி..!!

இண்டிகோ விமான நிறுவனத்தில் பணிபுரியும் அப்சல் என்ற காதுகேளாத மற்றும் பேச இயலாத ஊழியர், தனது அன்பான மற்றும் திறமையான சேவையால் இணையவாசிகளின் மனங்களை வென்றுள்ளார். இந்த நெகிழ்ச்சியான சம்பவத்தை அமன் சிங் என்ற பயணி வீடியோவாக எடுத்து தனது இன்ஸ்டாகிராம் பக்கத்தில் பகிர்ந்துள்ளார். அதில், லக்கேஜ் சரிபார்ப்பு மற்றும் போர்டிங் பாஸ் வழங்கும் பிரிவில் பணிபுரியும் அப்சல், பேசும் திறன் இல்லாத நிலையிலும், சைகைகள் மற்றும் புன்னகையின் மூலம் பயணிகளுக்கு மிகவும் எளிதாகவும் சாமர்த்தியமாகவும் வழிகாட்டியுள்ளார்.

அப்சல் தனது சட்டையில், “என்னால் கேட்கவோ பேசவோ முடியாது, ஆனால் உங்களுக்கு உதவுவதில் மகிழ்ச்சி அடைகிறேன்” என்ற வாசகம் அடங்கிய பேட்ஜ் ஒன்றை அணிந்திருந்தார். அதைப் பார்த்த பயணி அமன் சிங் வியப்படைந்ததுடன், பேசவும் கேட்கவும் தெரிந்த பலரை விட அப்சல் மிகவும் சிறப்பாகவும், பொறுமையாகவும் தன்னிடம் தொடர்பு கொண்டு உதவினார் என்று பாராட்டியுள்ளார். வார்த்தைகளைத் தாண்டியும் சிறப்பான முறையில் தகவல் பரிமாற்றம் செய்ய முடியும் என்பதை நிரூபித்த அப்சல், தனக்கு இன்றைய நாளின் மிகப்பெரிய உத்வேகமாக அமைந்தார் என்றும் அவர் நெகிழ்ச்சியுடன் குறிப்பிட்டுள்ளார்.

https://www.instagram.com/reel/DZ-H5Xeoink/?utm_source=ig_web_button_share_sheet

சமூக வலைதளங்களில் வைரலாகி வரும் இந்த வீடியோவைப் பார்த்த ஆயிரக்கணக்கான மக்கள், அப்சலின் அர்ப்பணிப்பைப் பாராட்டி வருகின்றனர். அத்துடன், மாற்றுத்திறனாளிகளுக்கு இதுபோன்ற வேலைவாய்ப்புகளை வழங்கி, அவர்களை உள்ளடக்கிய ஒரு சிறந்த பணிச்சூழலை உருவாக்கியதற்காக இண்டிகோ விமான நிறுவனத்திற்கும் நெட்டிசன்கள் தங்களது மனமார்ந்த பாராட்டுகளையும் வாழ்த்துகளையும் தெரிவித்து வருகின்றனர்.