தமிழக பாஜகவின் முன்னாள் மாநில தலைவரான அண்ணாமலை, கட்சியில் தனக்கு உரிய முக்கியத்துவமும் மரியாதையும் அளிக்கப்படவில்லை என்று கூறி அண்மையில் அதிலிருந்து விலகினார். அதனைத் தொடர்ந்து, இளைஞர்களை முன்னிறுத்தி அரசியலில் மாற்றத்தை ஏற்படுத்தும் நோக்கில் ‘வி தி லீடர்ஸ்’ (We The Leaders) என்ற புதிய அமைப்பை அவர் தொடங்கினார். இந்த அமைப்பு தொடங்கப்பட்ட சில நாட்களிலேயே பாஜகவிலிருந்து கணிசமான நிர்வாகிகளும், அரசியல் மாற்றத்தை விரும்பும் ஏராளமான இளைஞர்களும் இதில் தங்களை இணைத்துக் கொண்டனர். தற்போது இந்த அமைப்பில் சுமார் 18 லட்சம் பேர் உறுப்பினர்களாக உள்ள நிலையில், இந்த எண்ணிக்கை 50 லட்சத்தை எட்டும்போது இது அதிகாரப்பூர்வ அரசியல் கட்சியாக மாற்றப்படும் என்று எதிர்பார்க்கப்படுகிறது.
இந்நிலையில், ‘வி தி லீடர்ஸ்’ அமைப்பை அரசியல் கட்சியாக பதிவு செய்யும் பணிகள் தீவிரமாக நடைபெற்று வருவதாகவும், எதிர்காலத்தில் வரவிருக்கும் அனைத்துத் தேர்தல்களிலும் போட்டியிட திட்டமிட்டுள்ளதாகவும் அந்த அமைப்பின் ஒருங்கிணைப்பாளர் பிரபாகரன் திருநெல்வேலியில் செய்தியாளர்களிடம் தெரிவித்துள்ளார். மேலும், தங்களது அமைப்பு எந்தவொரு அரசியல் கட்சிக்கும் பினாமி கிடையாது என்று திட்டவட்டமாக மறுத்த அவர், தமிழர்களை முன்னிறுத்தி, தமிழ் மொழிக்கு முக்கியத்துவம் அளிக்கும் உன்னத நோக்கத்துடன் இது செயல்பட்டு வருகிறது என்றும் விளக்கமளித்தார்.
தொடர்ந்து பேசிய அவர், தமிழக வெற்றிக் கழக அரசு செயல்படுத்தி வரும் சில நல்ல திட்டங்களை வரவேற்பதாகக் கூறினார். குறிப்பாக, இளைஞர்களுக்கு முக்கியத்துவம் கொடுத்து அவர்களை அமைச்சர்களாக்கியுள்ள தவெக அரசின் முடிவைப் பாராட்டிய பிரபாகரன், அதே வேளையில் கொள்கை ரீதியாக தவெக-விற்கும் மற்ற திராவிட கட்சிகளுக்கும் பெரிய அளவில் வித்தியாசம் இருப்பதாக தங்களுக்குத் தெரியவில்லை என்றும் விமர்சித்தார். மேலும், தமிழகத்தில் பெருகிவரும் போதை கலாச்சாரத்திற்கு எதிராக, வரும் ஜூலை 19ஆம் தேதி திருச்செந்தூரில் பிரம்மாண்ட பொதுக்கூட்டம் நடத்தப்பட உள்ளதாகவும், அதில் அண்ணாமலை பங்கேற்க உள்ளதாகவும் அவர் குறிப்பிட்டார்.
தற்போது அமைப்பை அடிமட்ட அளவில் வலுப்படுத்தும் பணிகளில் கவனம் செலுத்தி வருவதாகக் குறிப்பிட்ட ஒருங்கிணைப்பாளர் பிரபாகரன், தேர்தல் அரசியலில் தங்களது இலக்குகள் குறித்துப் பேசினார். எதிர்காலத்தில் நடைபெறவிருக்கும் உள்ளாட்சித் தேர்தல், லோக்சபா தேர்தல் மற்றும் சட்டமன்றத் தேர்தல்களில் ‘வி தி லீடர்ஸ்’ கட்சி நேரடியாகப் போட்டியிடும் என்றும், அப்போதைய அரசியல் சூழலுக்கு ஏற்ப கூட்டணி குறித்து இறுதி முடிவு எடுக்கப்படும் என்றும் கூறினார். “தனது கட்சியில் நிரந்தர எம்.எல்.ஏ, எம்.பி என்று யாரும் இருக்க மாட்டார்கள்; புதியவர்களுக்கும் இளைஞர்களுக்கும் மட்டுமே முன்னுரிமை வழங்கப்படும்” என்ற அண்ணாமலையின் சிந்தனைப்படியே இக்கட்சி செயல்படும் என்றும், தமிழக அரசியலில் மிகப்பெரிய மாற்றத்தை ஏற்படுத்தும் சக்தியாக இது உருவெடுக்கும் என்றும் அவர் நம்பிக்கை தெரிவித்தார்.