தில்லி அரசின் பல்வேறு துறைகளில் காலியாக உள்ள 1,979 ஆசிரியர் மற்றும் அறிவியல் உதவியாளர் உள்ளிட்ட பலதரப்பட்ட பணியிடங்களை நிரப்புவதற்கான புதிய வேலைவாய்ப்பு அறிவிப்பை தில்லி துணைநிலைச் சேவைகள் தேர்வு வாரியம் வெளியிட்டுள்ளது. தகுதியும் ஆர்வமும் உள்ள இந்தியக் குடிமக்களிடமிருந்து இதற்கான ஆன்லைன் விண்ணப்பங்கள் வரவேற்கப்படுகின்றன. இந்த அறிவிப்பின் கீழ் ஜூனியர் சயின்டிஃபிக் அசிஸ்டன்ட், டெக்னிக்கல் அசிஸ்டன்ட் , அசிஸ்டன்ட் ஆர்க்கிவிஸ்ட், ஐடி அசிஸ்டன்ட், டேட்டா பிராசசிங் அசிஸ்டன்ட் மற்றும் டிரெய்ன்டு கிராஜுவேட் டீச்சர் உள்ளிட்ட பல்வேறு காலிப் பணியிடங்கள் நிரப்பப்பட உள்ளன.
இப்பணிகளுக்கு விண்ணப்பிக்க விரும்பும் விண்ணப்பதாரர்கள், பணியிடங்களுக்கு ஏற்ப ஐடிஐ பிளஸ் 2 தகுதி, ஏதேனும் ஒரு துறையில் இளங்கலை/முதுகலை பட்டம் அல்லது பி.எட் போன்ற தகுதிகளைப் பெற்றிருக்க வேண்டும். விண்ணப்பதாரர்களின் வயது வரம்பு 18 முதல் 27 வயதிற்குள் இருக்க வேண்டும். தேர்வு செய்யப்படும் தகுதியான நபர்களுக்கு மாதச் சம்பளமாக ரூ.29,200 முதல் ரூ.92,300 வரை வழங்கப்படும் எனத் தெரிவிக்கப்பட்டுள்ளது.
விண்ணப்பதாரர்கள் வாரியத்தால் நடத்தப்படும் இரண்டு கட்ட ஆன்லைன் எழுத்துத் தேர்வு மற்றும் நேர்முகத் தேர்வில் பெறும் மதிப்பெண்களின் அடிப்படையில் தகுதிப் பட்டியலின்படி தேர்வு செய்யப்படுவார்கள். இந்த எழுத்துத் தேர்வில் பொது அறிவு, பொது ஆங்கிலம் மற்றும் கணித நுண்ணறிவு சார்ந்த கேள்விகள் இடம்பெறும். தகுதியுடைய நபர்கள் www.dsssbonline.nic.in என்ற அதிகாரப்பூர்வ இணையதளம் மூலம் ஆன்லைனில் மட்டுமே விண்ணப்பிக்க முடியும். ஆன்லைனில் விண்ணப்பிப்பதற்கான கடைசி நாள் 2026, ஜூலை 15 ஆகும்.