“ஆட்சி மாறினால் காட்சிகள் மாறும்” என்ற அரசியல் பழமொழி தமிழகத்தில் மீண்டும் ஒருமுறை நிரூபிக்கப்பட்டுள்ளது. கடந்த காலங்களில் திமுக, அதிமுக ஆகிய இரு துருவங்களுக்கு இடையே ஆட்சி மாற்றம் ஏற்படும் போதெல்லாம் முன்னாள் அமைச்சர்கள் மீது வழக்குகள் பாய்வதும், சோதனைகள் நடப்பதும் ஒரு எழுதப்படாத விதியாகவே இருந்து வந்துள்ளது. தற்போது தமிழக அரசியல் களம் புதிய பாதையில் பயணித்து, தவெக ஆட்சியைப் பிடித்துள்ள நிலையிலும் இந்த அரசியல் மரபு மாறாமல் தொடர்கிறது. இதன் ஒரு பகுதியாக, திமுக ஆட்சியில் அமைச்சராக இருந்து பல்வேறு சர்ச்சைகளிலும் வழக்குகளிலும் சிக்கிய செந்தில் பாலாஜியின் இல்லத்தில் இன்று திடீரென காவல்துறையினர் நடத்திய விசாரணை பெரும் பரபரப்பை ஏற்படுத்தியுள்ளது.
முன்னாள் அமைச்சர் செந்தில் பாலாஜிக்கு கரூர் மற்றும் கோவையில் சொந்த வீடுகள் இருந்தாலும், சட்டமன்றக் கூட்டத்தொடரில் பங்கேற்பதற்கும் அரசியல் ஆலோசனைகளுக்காகவும் சென்னை எம்.ஆர்.சி. நகரில் வாடகைக்கு வீடு எடுத்து கடந்த ஒரு மாதமாகப் பயன்படுத்தி வந்தார். இந்நிலையில், இன்று காலை அவரது சென்னை இல்லத்திற்கு காவல்துறையினர் அதிரடியாகச் சென்றனர். அந்தச் சமயத்தில் செந்தில் பாலாஜி வீட்டில் இல்லை என்று கூறப்படும் நிலையில், அவரது கார் மட்டும் அங்கு நிறுத்தப்பட்டிருந்தது. வீட்டில் பணியில் இருந்த ஊழியர்களிடம் தீவிர விசாரணை நடத்திய போலீஸார், அவர்களின் செல்போன்களை வாங்கி சமீபத்தில் யாரிடமெல்லாம் பேசினார்கள் என்பது குறித்தும் சோதனையிட்டனர்.
செந்தில் பாலாஜி மீது ஏற்கனவே பல்வேறு முக்கிய வழக்குகள் நிலுவையில் உள்ளன. கரூரில் ஏற்பட்ட கூட்ட நெரிசல் வழக்கு, டிரான்ஸ்பார்மர் கொள்முதல் முறைகேடு வழக்கு ஆகியவற்றை சிபிஐ விசாரித்து வரும் வேளையில், போக்குவரத்துத் துறை வேலைவாய்ப்பு முறைகேடு வழக்கை அமலாக்கத்துறை விசாரித்து வருகிறது. இதனால் இன்று காலை செந்தில் பாலாஜியின் வீட்டில் திடீர் சோதனையில் ஈடுபட்டது எந்தத் துறையைச் சேர்ந்த அதிகாரிகள், எந்த வழக்கின் அடிப்படையில் இந்த நடவடிக்கை எடுக்கப்பட்டது என்ற தெளிவான தகவல் உடனடியாக வெளியாகாததால் அரசியல் வட்டாரத்தில் பெரும் குழப்பமும் விவாதமும் எழுந்தது.
மறுபுறம், இந்த அதிரடி நடவடிக்கையின் பின்னணியில் செந்தில் பாலாஜியின் தம்பி அசோக்கை தேடும் படலமும் தீவிரமடைந்துள்ளது. நேற்று இரவு வரை செந்தில் பாலாஜி சென்னையில் இருந்ததாகக் கூறப்படும் நிலையில், தலைமறைவாக உள்ள அவரது தம்பி அசோக்கை கரூரில் தேடிய காவல்துறையினர், அவர் அங்கு கிடைக்காததால் சென்னைக்கு வந்து இந்த விசாரணையைத் முடுக்கிவிட்டுள்ளதாகத் தகவல்கள் தெரிவிக்கின்றன. செந்தில் பாலாஜி இல்லத்திற்குள் சில உயர் அதிகாரிகளும், வெளியே ஏராளமான போலீஸாரும் குவிக்கப்பட்டிருந்த இந்தச் சம்பவம், தவெக ஆட்சியிலும் அரசியல் பழிவாங்கல் நடவடிக்கைகள் தொடர்கிறதா அல்லது சட்டப்படியான விசாரணையா என்ற விவாதத்தை சமூகத்தில் கிளப்பியுள்ளது.