தமிழக சட்டமன்றத் தேர்தலில் அமோக வெற்றி பெற்று, தமிழக வெற்றிக் கழகத்தின் தலைவர் விஜய் முதலமைச்சராகப் பொறுப்பேற்றுள்ள நிலையில், மாநில அரசியலில் அடுத்தடுத்து பல்வேறு அதிரடி மாற்றங்கள் அரங்கேறி வருகின்றன. விஜய்யின் இந்த அசுர அரசியல் எழுச்சியால், திமுக கூட்டணியில் இருந்த காங்கிரஸ், விசிக, கம்யூனிஸ்ட் கட்சிகள் மற்றும் இந்தியன் யூனியன் முஸ்லிம் லீக் போன்ற முக்கிய கட்சிகள் தவெகவை நோக்கி நகரத் தொடங்கியுள்ளன. அதே வேளையில், பிரதான எதிர்க்கட்சியான அதிமுகவின் சிட்டிங் எம்எல்ஏக்கள், முன்னாள் அமைச்சர்கள் மற்றும் முக்கிய நிர்வாகிகள் பலரும் தங்கள் பதவிகளை ராஜினாமா செய்துவிட்டு தவெகவில் ஐக்கியமாகி வருகின்றனர். இந்த அரசியல் புயலுக்கு மத்தியில், தற்போது ஒரு முழுமையான கட்சியே தவெகவுடன் இணைய உள்ளதாக நம்பத்தகுந்த தகவல்கள் வெளியாகியுள்ளன.
தேசிய செட்டியார் பேரவையின் தலைவராக இருந்து, கடந்த 2025 செப்டம்பர் மாதம் மதுரையில் ‘நமது மக்கள் முன்னேற்ற கழகம்’ என்ற கட்சியைத் தொடங்கியவர் பி.எல்.ஏ. ஜெகநாத் மிஸ்ரா. ஆரம்பத்தில் திமுக கூட்டணிக்கு ஆதரவு தெரிவித்து வந்த இவர், சட்டமன்றத் தேர்தல் நெருங்கிய வேளையில், தவெக சார்பில் தேனி மாவட்டம் கம்பம் சட்டமன்றத் தொகுதியில் போட்டியிடும் அரிய வாய்ப்பைப் பெற்றார். இதனால் உடனடியாக திமுக கூட்டணியில் இருந்து வெளியேறி, விஜய்யின் தமிழக வெற்றிக் கழகத்துடன் கைகோர்த்து தேர்தல் களத்தில் தீவிரமாகப் பணியாற்றினார்.
கம்பம் தொகுதியில் தவெக வேட்பாளராகக் களம் இறங்கிய ஜெகநாத் மிஸ்ரா, அங்கு சிட்டிங் எம்எல்ஏவாக இருந்த ராமகிருஷ்ணனை எதிர்த்து மிகக் கடுமையான போட்டியை எதிர்கொண்டார். விறுவிறுப்பாக நடைபெற்ற இந்த தேர்தல் வாக்கு எண்ணிக்கையின் இறுதியில், ஜெகநாத் மிஸ்ரா 85,394 வாக்குகள் பெற்று அசத்தல் வெற்றி பெற்றார். அவரை எதிர்த்துப் போட்டியிட்ட ராமகிருஷ்ணன் 84,643 வாக்குகள் பெற்று, வெறும் 751 வாக்குகள் வித்தியாசத்தில் நூலிழையில் தோல்வியைத் தழுவினார்.
இந்த பரபரப்பான வெற்றிக்குப் பிறகு, கம்பம் தொகுதி எம்எல்ஏவான ஜெகநாத் மிஸ்ரா, தனது தாய் கட்சியான ‘நமது மக்கள் முன்னேற்ற கழகத்தை’ ஒட்டுமொத்தமாகத் தமிழக வெற்றிக் கழகத்துடன் இணைக்க முடிவு செய்துள்ளார். முதல்வர் விஜய்யின் தலைமைத்துவத்திற்கு வலுசேர்க்கும் விதமாக இன்று அதிகாரப்பூர்வமாக இந்த இணைப்பு நடைபெற உள்ளதாகக் கூறப்படுகிறது. ஒரு கட்சியின் முழுமையான இந்த வரவு, தமிழக வெற்றிக் கழகத்தின் பலத்தை மேலும் அதிகரிப்பதுடன், தமிழக அரசியலில் விஜய்யின் ஆதிக்கத்தை இன்னும் பல மடங்கு உயர்த்தும் என அரசியல் விமர்சகர்கள் கருதுகின்றனர்.