மத்திய அரசு ஏழை எளிய மக்களின் நலனுக்காகப் பல்வேறு திட்டங்களைச் செயல்படுத்தி வருகிறது. அதில் ஒன்றுதான் ‘தேசியக் குடும்ப நலத் திட்டம்’ சமூக ஊடகங்களில் பரவுவது போல வறுமைக் கோட்டிற்குக் கீழே உள்ள அனைத்துக் குடும்பங்களுக்கும் பொதுவாக 20,000 ரூபாய் வழங்கப்படுவதில்லை. மாறாக, ஒரு குடும்பத்தின் முக்கிய வருவாய் ஈட்டுபவர் திடீரென உயிரிழக்கும் போது, பொருளாதார ரீதியாகப் பாதிக்கப்படும் அந்த ஏழைக் குடும்பத்திற்கு உடனடி நிதி நிவாரணமாக மட்டுமே இந்த 20,000 ரூபாய் ஒருமுறை நேரடியாக வழங்கப்படுகிறது.
இத்திட்டத்தின் கீழ் பயன் பெற வெறும் வறுமைக் கோட்டிற்குக் கீழ் உள்ளவர்களுக்கான அட்டை வைத்திருப்பது மட்டுமே போதாது; சில முக்கிய விதிமுறைகளைப் பூர்த்தி செய்ய வேண்டும். முதலாவதாக, மரணமடைந்தவர் அக்குடும்பத்தின் முதன்மை வருமானம் ஈட்டுபவராக இருக்க வேண்டும். மேலும், அரசு நிர்ணயித்துள்ள குறிப்பிட்ட வயது வரம்பு மற்றும் நிதி சார்ந்த தகுதி அளவுகோல்களுக்குள் அக்குடும்பம் வர வேண்டும். சமர்ப்பிக்கப்படும் விண்ணப்பங்கள் மற்றும் ஆவணங்களைச் சம்பந்தப்பட்ட அரசு அதிகாரிகள் கள ஆய்வு செய்து சரிபார்த்த பிறகே இதற்கான ஒப்புதல் வழங்கப்படும்.
இத்திட்டத்திற்கு விண்ணப்பிக்க இறப்புச் சான்றிதழ், குடும்ப அட்டை (ரேஷன் கார்டு), வங்கிக் கணக்கு விவரங்கள், வருமானச் சான்றிதழ், குடும்ப உறுப்பினர்களின் விவரங்கள் மற்றும் அடையாளச் சான்றுகள் போன்ற ஆவணங்கள் அவசியமாகும். மாநிலத்திற்கு மாநிலம் இந்த ஆவண நடைமுறைகள் சற்று மாறுபடலாம். எனவே, சமூக ஊடகங்களில் வரும் அரைகுறை தகவல்களை நம்பாமல், உங்கள் மாவட்டத்தில் உள்ள சம்பந்தப்பட்ட அரசு நிர்வாக அலுவலகத்தையோ அல்லது அதிகாரப்பூர்வ அரசு இணையதளங்களையோ அணுகி துல்லியமான விவரங்களைப் பெற்று விண்ணப்பிப்பதே சரியான வழியாகும்.