கர்நாடக மாநிலம் கொப்பல் மாவட்டத்தில், ஒரு சிறுவன் தனது தந்தை, தாய் மற்றும் மூத்த சகோதரியை கத்தியால் குத்திய அதிர்ச்சி சம்பவம் அரங்கேறியுள்ளது. இந்த பயங்கர தாக்குதலில் சிறுவனின் தந்தை மற்றும் மூத்த சகோதரி ஆகிய இருவர் சம்பவ இடத்திலேயே பரிதாபமாக உயிரிழந்தனர். இச்சம்பவம் அப்பகுதியில் பெரும் சோகத்தையும் பரபரப்பையும் ஏற்படுத்தியுள்ளது.
தாக்குதலில் படுகாயமடைந்த சிறுவனின் தாயின் நிலைமை மிகவும் கவலைக்கிடமாக உள்ளது. அவர் உடனடியாக மீட்கப்பட்டு, தற்போது பல்லாரியில் உள்ள ஒரு மருத்துவமனையில் தீவிர சிகிச்சை பிரிவில் அனுமதிக்கப்பட்டு சிகிச்சை பெற்று வருகிறார். அவரை காப்பாற்ற மருத்துவர்கள் தீவிரமாக போராடி வருகின்றனர்.
இந்த கொடூர சம்பவத்தின் போது, அந்த சிறுவனுக்கும் சில காயங்கள் ஏற்பட்டுள்ளன. அவனுக்கும் தற்போது மருத்துவமனையில் போலீஸ் காவலுடன் கூடிய மருத்துவ சிகிச்சை அளிக்கப்பட்டு வருகிறது. இந்த தாக்குதலுக்கான பின்னணி காரணம் என்ன, குடும்பத்திற்குள் என்ன பிரச்சனை நடந்தது என்பது குறித்து காவல்துறையினர் வழக்குப்பதிவு செய்து தீவிர விசாரணை நடத்தி வருகின்றனர்.