பிரபல தொலைக்காட்சியில் ஒளிபரப்பாகி வரும் ‘நீயா நானா’ நிகழ்ச்சியில் வாரந்தோறும் சமூகத்தில் நடக்கும் முக்கியப் பிரச்சினைகள் குறித்து விவாதிக்கப்படுவது வழக்கம். அந்த வகையில், இந்த வாரம் “ஏன் பள்ளிக் கட்டணம் இவ்வளவு அதிகம்? கேள்வி கேட்கும் பெற்றோர்களும், பதில் சொல்லும் பள்ளி நிர்வாகிகளும்” என்ற மிகவும் தற்போதைய மற்றும் அவசியமான தலைப்பில் விவாதம் நடைபெற உள்ளது. இந்நிகழ்ச்சி தொடங்கிய நாள் முதல் இன்று வரை கோபிநாத் தனது கணீரென்ற குரலாலும், சாதுரியமான கேள்விகளாலும் இதனைத் தொகுத்து வழங்கி வருகிறார். இந்த வார விவாதமும் மக்களிடையே பெரும் எதிர்பார்ப்பை ஏற்படுத்தியுள்ளது.
இந்த விவாதத்தில் பங்கேற்ற பெற்றோர்கள் தங்களின் குமுறல்களையும், தற்போதைய கல்விச் செலவுகளையும் வெளிப்படையாகப் பகிர்ந்துள்ளனர். குறிப்பாக, ஒரு பெற்றோர் தனது குழந்தைக்கு ப்ரீ-கேஜி சேர்க்கைக்கே இந்த ஆண்டு ஒரு லட்சத்து 20 ஆயிரம் ரூபாய் கட்டணம் செலுத்தியதாகக் கூறி அதிர்ச்சியை ஏற்படுத்தியுள்ளார். மற்றொரு தந்தை, தனது பிள்ளையின் 12-ஆம் வகுப்புப் படிப்பிற்கு ஒரு லட்சத்து 34 ஆயிரம் ரூபாய் கட்டியதாகக் குறிப்பிட்டுள்ளார். ஆரம்பக் கல்விக்கே இவ்வளவு பெரிய தொகையைச் செலவிட வேண்டியிருப்பது நடுத்தரக் குடும்பங்களுக்கு எவ்வளவு பெரிய சுமை என்பதை இவர்களின் ஆதங்கங்கள் காட்டுகின்றன.
இதற்குப் பதில் அளித்துள்ள பள்ளி நிர்வாகிகள், தற்போதைய காலகட்டத்தில் பள்ளிகளில் வழங்கப்படும் உலகத்தரம் வாய்ந்த உள்கட்டமைப்பு வசதிகள், நவீன தொழில்நுட்பக் கல்வி, ஏசி வகுப்பறைகள் மற்றும் தகுதியான ஆசிரியர்களுக்கான ஊதியம் போன்ற காரணங்களால் தான் கட்டணம் இந்த அளவிற்கு உயர்ந்துள்ளது எனத் தங்கள் தரப்பு நியாயங்களை முன்வைத்துள்ளனர். இருப்பினும், இன்றைய சூழலில் தனியார் பள்ளிகளின் கட்டணம் என்பது ஏழை மற்றும் நடுத்தர மக்களின் பொருளாதார நிலையைத் தாண்டி மிக அதிகமாகவே இருப்பதால், தங்கள் பிள்ளைகளுக்கு நல்ல கல்வி கொடுக்க நினைக்கும் சாமானிய மக்கள் பெரும் அவதிக்குள்ளாகி வருகின்றனர் என்பதே கசப்பான உண்மையாகும்.