சர்வதேசக் கடல் வழித்தடங்களின் பாதுகாப்பை உறுதி செய்யும் நோக்கில், ஈரானின் தென் பகுதியில் அமைந்துள்ள கோருக் (Goruk) நகரம் மற்றும் புகழ்பெற்ற கெஷ்ம் தீவு (Qeshm Island) ஆகிய பகுதிகளில் உள்ள ஈரானிய ரேடார் நிலையங்கள் மற்றும் ஆளில்லா ட்ரோன் தளங்களைக் குறிவைத்து அமெரிக்கா வான்வழித் தாக்குதல்களை நடத்தியுள்ளது. சர்வதேச கடல் எல்லை வான்வெளியில் பறந்து கொண்டிருந்த அமெரிக்காவின் ‘எம்கியூ1’ (MQ1) ரக அதிநவீன ஆளில்லா உளவு ட்ரோனை ஈரான் சமீபத்தில் சுட்டு வீழ்த்தியதற்குப் பதிலடியாகவே, இந்தத் தற்காப்புத் தாக்குதல் (Self-defense strikes) நடத்தப்பட்டதாக அமெரிக்க சென்டரல் கமெண்ட் (CENTCOM) தனது அதிகாரப்பூர்வ ‘எக்ஸ்’ பக்கத்தில் தெளிவுபடுத்தியுள்ளது.
அமெரிக்கப் படைகளின் இந்தத் துல்லியமான குண்டுவீச்சின் மூலம் ஈரானின் வான் பாதுகாப்பு அமைப்புகள், ட்ரோன்களைக் கட்டுப்படுத்தும் ஒரு தரைக்கட்டுப்பாட்டு நிலையம் (Ground control station) மற்றும் தாக்குதலுக்குத் தயாராக வைக்கப்பட்டிருந்த இரண்டு ‘ஒன்-வே அட்டாக்’ ரக தற்கொலைப்படை ட்ரோன்கள் ஆகியவை முழுமையாகத் தகர்த்து அழிக்கப்பட்டுள்ளதாக அமெரிக்கா தெரிவித்துள்ளது. கடல் பகுதியில் பயணிக்கும் சர்வதேச வணிகக் கப்பல்களுக்குப் பெரும் அச்சுறுத்தலாக விளங்கிய ஈரானின் முக்கியப் பாதுகாப்பு அமைப்புகள் இதன் மூலம் ஒழிக்கப்பட்டதாக அமெரிக்கா கூறினாலும், இதற்குச் சற்று முன்பு தான் ஈரான், குவைத்தில் இருக்கும் அமெரிக்க வான்படைத் தளம் மீது ஏவுகணை மற்றும் ட்ரோன் தாக்குதல்களை நடத்தியிருந்தது என்பது குறிப்பிடத்தக்கது.
மத்திய கிழக்கில் நிலவும் இந்த நேருக்கு நேர் ராணுவ மோதல் சூழல், உலகளாவிய கச்சா எண்ணெய் விநியோகச் சங்கிலியில் கடுமையான தாக்கத்தை ஏற்படுத்தும் எனப் பொருளாதார வல்லுநர்கள் எச்சரிக்கின்றனர். இந்தியாவின் கச்சா எண்ணெய் இறக்குமதி விலை ஏப்ரல் மாதத்தில் ஒரு பேரல் 114.48 டாலராக இருந்து, மே மாத இறுதியில் 97.52 டாலராகக் குறைந்திருந்த நிலையில், தற்போதைய வான்வழித் தாக்குதல்களால் சர்வதேச சந்தையில் கச்சா எண்ணெய் விலை மீண்டும் எகிறக்கூடும். உள்நாட்டில் இன்று சிலிண்டர் விலை மட்டுமே உயர்ந்துள்ள போதிலும், வரும் நாட்களில் போக்குவரத்துச் செலவுகள் அதிகரித்து அத்தியாவசியப் பொருட்களின் விலையும் உயரக்கூடும் என்பதால் வளைகுடா பகுதியின் இப்பதற்றம் சர்வதேச அளவில் பெரும் கவலையை உருவாக்கியுள்ளது.