தமிழக தலைமைச் செயலக வரலாற்றில் முதல்முறையாக, அரசு அதிகாரிகள் மற்றும் பணியாளர்களுக்கு பயோமெட்ரிக் (கைரேகை) அல்லது முக அங்கீகார அடிப்படையிலான வருகைப் பதிவு முறை ஜூன் 1 முதல் கட்டாயமாக்கப்பட்டுள்ளது. முதற்கட்டமாக மனிதவள மேலாண்மைத் துறையில் அமல்படுத்தப்படும் இந்த நடவடிக்கை, பின்னர் படிப்படியாக மற்ற அனைத்து துறைகளுக்கும் விரிவுபடுத்தப்பட உள்ளது.
புதிய விதிமுறைகளின்படி, அனைத்து பணியாளர்களும் காலை 10 மணிக்குள் அலுவலகத்திற்கு வந்து பயோமெட்ரிக் முறையில் வருகையைப் பதிவு செய்ய வேண்டும். மேலும், பணியில் இருக்கும் நேரத்தில் ஊழியர்கள் அனைவரும் கண்டிப்பாக தங்களின் அடையாள அட்டையை அணிந்திருக்க வேண்டும் என உத்தரவிடப்பட்டுள்ளது. முன்னதாக, ஊழியர்களின் ஆட்சேபனை காரணமாக தற்காலிகமாக நிறுத்தி வைக்கப்பட்டிருந்த இந்த நடைமுறை, சோதனை ஓட்டம் வெற்றிகரமாக முடிந்ததைத் தொடர்ந்து தற்போது முழுமையாக அமலுக்கு வந்துள்ளது.
இதேபோல், தலைமைச் செயலகத்தின் பிற துறைகளிலும் வருகைப்பதிவு விதிகள் கடுமையாக்கப்பட்டுள்ளன. குறிப்பாக, உணவு மற்றும் கூட்டுறவுத் துறையில் ஊழியர்கள் காலை 9.50 மணிக்கும், அலுவலக உதவியாளர்கள் காலை 9.30 மணிக்கும் கண்டிப்பாக பணிக்கு வர வேண்டும் என்று அறிவுறுத்தப்பட்டு, அலுவலக நேரத்தை ஊழியர்கள் துல்லியமாகப் பின்பற்றுவது கட்டாயமாக்கப்பட்டுள்ளது.