கார்ப்பரேட் துறையில் நிலவும் கடுமையான பணிச்சுமை மற்றும் மன உளைச்சல் காரணமாக, அதிக சம்பளம் தரும் ஐடி வேலையைத் துறந்துவிட்டு கேரளாவைச் சேர்ந்த பெண் ஒருவர் ஆட்டோ ஓட்டுநராக மாறியுள்ள வீடியோ இணையத்தில் பலரது கவனத்தையும் ஈர்த்து வைரலாகி வருகிறது. சுமார் 9 ஆண்டுகள் கார்ப்பரேட் வாழ்க்கையில் பயணித்த அவர், அங்கு நிலவிய தொடர் அழுத்தங்கள் காரணமாக நிம்மதியை இழந்துள்ளார். இதனால் தனது உயர் பதவியையும், கைநிறைய வந்த சம்பளத்தையும் உதறிவிட்டு, வாழ்வாதாரத்திற்காக ஆட்டோ ஓட்டும் தொழிலைத் தேர்ந்தெடுத்துள்ளார்.
தற்போது ஆட்டோ ஓட்டுநராகப் பணிபுரிவது தனக்கு முழு சுதந்திரத்தையும், மன நிறைவையும் தருவதாக அவர் நெகிழ்ச்சியுடன் குறிப்பிட்டுள்ளார். இந்த புதிய தொழிலின் மூலம் அவர் தற்போதும் மாதம் சுமார் ரூ.60,000 வரை வருமானம் ஈட்டி வருகிறார். ஆடம்பரமான கார்ப்பரேட் வாழ்க்கையை விட, நிம்மதியான மன அமைதியே வாழ்க்கைக்கு மிக முக்கியம் என்பதை உணர்த்தும் இவரது முடிவு, பலருக்கும் ஊக்கமளிப்பதாக அமைந்துள்ளது.