புதுச்சேரியில் தேஜ கூட்டணி ஆட்சியமைத்து ஒரு மாதம் ஆகப் போகும் நிலையிலும், அமைச்சர்களுக்கான இலாகா ஒதுக்கீடு மற்றும் சபாநாயகர், துணை சபாநாயகர் தேர்தல் நடத்துவதில் என்.ஆர். காங்கிரஸ் மற்றும் பா.ஜ.க இடையே தொடர்ந்து இழுபறி நீடித்து வருகிறது. நமச்சிவாயத்திற்கு உள்துறை வழங்க முடியாது என்றும், லட்சுமி நாராயணனுக்கு (லஜக ஜோஸ் மார்ட்டின்) அமைச்சரவையில் இடமில்லை என்றும் முதலமைச்சர் ரங்கசாமி பிடிவாதமாக இருப்பதால் பா.ஜ.க டெல்லி தலைமை அதிருப்தியில் உள்ளது. பா.ஜ.க தேசியத் தலைவர்கள் பலமுறை நேரில் பேச்சுவார்த்தை நடத்தியும் ரங்கசாமி பிடிகொடுக்காமல் மழுப்பி வருவதால், நியமன எம்.எல்.ஏக்கள் விவகாரம் உள்ளிட்ட பல்வேறு காரணங்களால் அமைச்சரவை விரிவாக்கம் காலதாமதமாகி வருகிறது.
இந்தச் சூழலில், செய்தியாளர்களைச் சந்தித்த முதலமைச்சர் ரங்கசாமி, சபாநாயகர் யார் என்பது விரைவில் தெரியவரும் என்றும், அடுத்த வாரம் அமைச்சரவை விரிவாக்கம் செய்யப்பட்டு யாருக்கு எந்த துறை என்பது அறிவிக்கப்படும் என்றும் தெரிவித்துள்ளார். மேலும், அமைச்சர்களுக்கு இலாகா ஒதுக்காததால் அரசுப் பணிகள் எதுவும் முடங்கவில்லை என்றும், தான் ஏற்கனவே 20 முக்கிய கோப்புகளில் கையெழுத்திட்டுள்ளதாகவும் அவர் விளக்கம் அளித்துள்ளார்.
இத்தகைய பரபரப்பான அரசியல் சூழ்நிலைக்கு மத்தியில், பா.ஜ.க அமைச்சர் நமச்சிவாயம், ஒன்றிய உள்துறை அமைச்சர் அமித்ஷாவின் அழைப்பின் பேரில் அவசரப் பயணமாக டெல்லி சென்றுள்ளார். இன்று மாலை அமித்ஷாவைச் சந்திக்கும் அவர், புதுச்சேரி பா.ஜ.க அமைச்சர்களுக்கான இலாகா ஒதுக்கீடு மற்றும் சபாநாயகர் பதவி விவகாரங்கள் குறித்து முக்கிய ஆலோசனை நடத்தவுள்ளார். இந்தச் சந்திப்பைத் தொடர்ந்து, இறுதி முடிவு எடுப்பதற்காக அமித்ஷா, முதலமைச்சர் ரங்கசாமியிடம் தொலைபேசி மூலம் பேசி இப்பிரச்சினைக்குத் தீர்வு காணத் திட்டமிட்டுள்ளதாகத் தகவல்கள் வெளியாகியுள்ளன.