நாகர்கோவிலில் உள்ள திமுக அலுவலகத்தின் மீது, தமிழக வெற்றிக் கழகத்தின் (TVK) கொடியுடன் வந்த கும்பல் ஒன்று தாக்குதல் நடத்தியதாகப் புகார் எழுந்துள்ளது. இந்தத் தாக்குதலில் திமுக அலுவலகத்தின் நுழைவாயில் கதவு (Gate) உடைக்கப்பட்டதால், அப்பகுதியில் பெரும் பரபரப்பு ஏற்பட்டது. இச்சம்பவத்தைக் கேள்விப்பட்டு ஏராளமான திமுகவினர் அங்கு திரண்டதால் இரு தரப்பினருக்கும் இடையே பதற்றமான சூழல் உருவானது.
போலீசாரின் முதற்கட்ட விசாரணையில், மினி சரக்கு வாகனத்தில் TVK கொடியுடன் வந்தவர்கள், அருகில் உள்ள கோயில் திருவிழாவிற்குப் பணி செய்ய வந்தவர்கள் என்பது தெரியவந்துள்ளது. அந்தப் பணியாளர்களிடையே ஏற்பட்ட திடீர் மோதலின் காரணமாகவே இந்த அசம்பாவிதம் நிகழ்ந்துள்ளது எனப் போலீசார் கண்டறிந்துள்ளனர். இந்தச் சம்பவம் அப்பகுதியில் தற்காலிக சலசலப்பை ஏற்படுத்தினாலும், காவல்துறையினர் நிலைமையைக் கட்டுக்குள் கொண்டு வந்து தீவிர விசாரணை நடத்தி வருகின்றனர்.