தமிழக அரசியலில் எப்போதும் எதிர்பாராத திருப்பங்களுக்குப் பஞ்சமிருக்காது. ஆனால், சமீபத்தில் நடந்து முடிந்த சட்டப்பேரவைத் தேர்தல் முடிவுகளும், அதைத் தொடர்ந்து அமைந்துள்ள புதிய அமைச்சரவையும் தமிழக அரசியல் வரலாற்றிலேயே இதுவரை கண்டிராத ஒரு விசித்திரமான திருப்பத்தை ஏற்படுத்தியுள்ளன. இத்தேர்தலில் நடிகர் விஜய் தலைமையிலான தமிழக வெற்றிக் கழகம் (தவெக) 108 இடங்களைக் கைப்பற்றி பிரம்மாண்ட வெற்றியைப் பதிவு செய்துள்ளது. இந்த வெற்றியைத் தொடர்ந்து, ஆட்சி அமைப்பதற்கான பெரும்பான்மையை உறுதி செய்ய, தவெக வரலாற்றுப் பூர்வமாக காங்கிரஸ் கட்சியுடன் கூட்டணி அமைத்துள்ளது. திமுக கூட்டணியில் வெறும் 5 இடங்களை மட்டுமே பெற்று சோர்வடைந்திருந்த காங்கிரஸ் கட்சி, தவெகவின் அழைப்பை ஏற்று எவ்வித நிபந்தனையுமின்றி ஆதரவளிப்பதாக அறிவித்தது தமிழக அரசியலில் பெரும் அதிர்வலைகளை ஏற்படுத்தியது.
இந்த அரசியல் நகர்வுகளுக்கு மத்தியில், முதல்வர் விஜய் தலைமையிலான அமைச்சரவையில் இடம் பெற்றுள்ள 8 அமைச்சர்களின் பின்னணி தற்போது அரசியல் வட்டாரத்தில் மிக ஹாட் டாபிக்காக விவாதிக்கப்பட்டு வருகிறது. ஏனெனில், தேர்தல் களத்தில் தற்போதைய கூட்டணிக் கட்சியான காங்கிரஸின் வேட்பாளர்களைக் கடுமையாக எதிர்த்து, அவர்களைத் தோற்கடித்த தவெகவின் 8 முக்கியத் தலைவர்களுக்கே முதல்வர் விஜய் தற்போது அமைச்சர் பதவிகளை வழங்கியுள்ளார். அரசியல் முரண்பாடுகள் உச்சத்தில் இருந்த தேர்தல் களத்தில் காங்கிரஸ் வேட்பாளர்களைத் துவம்சம் செய்தவர்களுக்கே, இன்று அதே காங்கிரஸின் ஆதரவோடு அமைந்துள்ள அமைச்சரவையில் முக்கியப் பொறுப்புகள் வழங்கப்பட்டிருப்பது, தமிழக அதிகாரப் பகிர்வின் புதிய யதார்த்தத்தை வெளிச்சம் போட்டுக் காட்டுகிறது.
இந்த விசித்திரமான பட்டியலில் இடம் பெற்றுள்ள அமைச்சர்களின் தேர்தல் வெற்றிகள் அனைத்தும் சாதாரணமானவை அல்ல. ஈரோடு கிழக்கில் காங்கிரஸ் வேட்பாளர் கோபிநாத் பழனியப்பனை 23,966 வாக்குகள் வித்தியாசத்தில் வீழ்த்திய விஜய் பாலாஜி, திருவாடனையில் ஆர்.எம். கருமாணிக்கத்தைத் தோற்கடித்த ராஜீவ், கடலூரில் சந்திரசேகரனை வீழ்த்திய ராஜ்குமார் ஆகியோருக்கு அமைச்சர் பதவி கிடைத்துள்ளது. மேலும், காரைக்குடியில் மாங்குடியை 46,074 வாக்குகள் வித்தியாசத்தில் தோற்கடித்த டி.கே.பிரபு, அறந்தாங்கியில் டி.ராமச்சந்திரனை வீழ்த்திய முகமது பர்வேஸ், சிவகாசியில் ஜி.அசோகனை வென்ற கீர்த்தனா மற்றும் ஆர்.குமார் ஆகியோரும் இதில் அடங்குவர். எல்லாவற்றிற்கும் மேலாக, ஸ்ரீபெரும்புதூர் தொகுதியில் தமிழக காங்கிரஸ் தலைவர் செல்வப்பெருந்தகையை 54,246 வாக்குகள் என்ற பிரம்மாண்ட வித்தியாசத்தில் வீழ்த்திய தென்னரசுவுக்கு அமைச்சர் பதவி வழங்கப்பட்டிருப்பதுதான் இதில் ‘வேற லெவல்’ அரசியல் திருப்பமாகப் பார்க்கப்படுகிறது.
தேர்தல் களத்தில் காங்கிரஸின் வெற்றி வாய்ப்புகளைத் தவிடுபொடியாக்கிய தவெகவின் முன்னணி வீரர்களுக்கு, இன்று அதே காங்கிரஸ் ஆதரவு பெற்ற அமைச்சரவையில் முதல்வர் விஜய் அழகு பார்த்திருப்பது ஒருபுறமிருக்க, மறுபுறம் காங்கிரஸ் கட்சியைச் சேர்ந்த ராஜேஷ்குமார் மற்றும் விஸ்வநாதன் ஆகியோரும் அமைச்சர்களாகப் பதவியேற்றுள்ளனர். இது இரு கட்சிகளுக்கும் இடையே நிலவும் சமரசப் போக்கையும், அதிகார அரசியலின் நுணுக்கமான நகர்வுகளையும் காட்டுகிறது. பாரம்பரியமான அரசியல் வியூகங்களை உடைத்தெறிந்து விஜய் மேற்கொண்டுள்ள இந்த அதிரடி அதிகாரப் பகிர்வு, வரும் காலங்களில் தவெக-காங்கிரஸ் கூட்டணியில் எத்தகைய தாக்கத்தை ஏற்படுத்தப்போகிறது என்பதைப் பொறுத்திருந்துதான் பார்க்க வேண்டும்.