கோவை சிறுமி கொலை வழக்கு தொடர்பாக மேற்கு மண்டல ஐஜி ரம்யா பாரதி செய்தியாளர்களைச் சந்தித்து விவரங்களை வெளியிட்டார். மாலை 6 மணிக்கு குழந்தை காணவில்லை என்று 100 என்ற எண்ணிற்கு வந்த தகவலை அடுத்து, இரவு 10 மணிக்கு வழக்குப்பதிவு செய்யப்பட்டு 5 தனிப்படைகள் அமைக்கப்பட்டு தீவிர விசாரணை நடத்தப்பட்டது. சம்பவ இடத்தின் சிசிடிவி காட்சிகளை ஆய்வு செய்தபோது, பக்கத்து வீட்டைச் சேர்ந்த கார்த்தி என்ற வாலிபர் சிறுமியை ஆசை வார்த்தை கூறி அழைத்துச் சென்றது கண்டறியப்பட்டது.
விசாரணையில், கார்த்தி சிறுமியை அழைத்துச் சென்று பாலியல் வன்கொடுமை செய்து கொடூரமாகக் கொலை செய்துள்ளது தெரியவந்தது. இதையடுத்து பதுங்கி இருந்த குற்றவாளியை போலீசார் மடக்கிப் பிடித்தபோது, அவன் தப்பியோட முயன்றதில் அவனது வலது கை மற்றும் காலில் எலும்பு முறிவு ஏற்பட்டது. குற்றம் நடந்த 24 மணி நேரத்திற்குள்ளாகவே இந்த வழக்கின் குற்றவாளிகளான கார்த்தி மற்றும் அவனுக்கு உடந்தையாக இருந்த மோகன் ஆகியோர் போலீசாரால் கைது செய்யப்பட்டுள்ளனர்.
கைது செய்யப்பட்ட இருவர் மீதும் போக்சோ (POCSO) சட்டத்தின் கீழ் வழக்குப்பதிவு செய்யப்பட்டுள்ளதுடன், அவர்கள் மீது கடுமையான நடவடிக்கை எடுக்கப்படும் என்று ஐஜி ரம்யா பாரதி உறுதியளித்துள்ளார். மேலும், குற்றவாளிகளை விரைந்து கைது செய்தது போலவே, இந்த வழக்கிற்கான குற்றப் பத்திரிகையும் மிக விரைவாகத் தயாரிக்கப்பட்டு அவர்களுக்கு உரிய தண்டனை பெற்றுத் தரப்படும் என்றும், சிறுமியின் பிரேத பரிசோதனை அறிக்கை வந்த பிறகு முழுமையான விவரங்கள் தெரிவிக்கப்படும் என்றும் அவர் கூறினார்.