தமிழகத்தில் புதிய ஆட்சி மாற்றம் ஏற்பட்டு, தமிழக வெற்றிக் கழகத்தின் தலைவர் விஜய் முதலமைச்சராகப் பொறுப்பேற்று இரண்டு வாரங்கள் கடந்துவிட்டன. தேர்தல் களத்தில் தவெக தரப்பில் முன்வைக்கப்பட்ட மிக முக்கியமான வாக்குறுதிகளில் ஒன்று ‘மதிப்புமிகு மகளிர் திட்டம்’. முந்தைய திமுக ஆட்சியில் வழங்கப்பட்டு வந்த ‘கலைஞர் மகளிர் உரிமைத் தொகை’ திட்டத்தின் கீழ் வழங்கப்பட்ட ரூ.1,000 உதவித்தொகையை உயர்த்தி, மாதம் ரூ.2,500 ஆக வழங்கப்படும் என்று விஜய் அறிவித்திருந்தார். இத்திட்டத்தின் பெயரையும் மாற்றி, தகுதியுள்ள அனைத்துப் பெண்களுக்கும் இந்த நிதி உதவி சென்றடையும் என வாக்குறுதி அளிக்கப்பட்டதால், தமிழகப் பெண்கள் மத்தியில் இந்தத் தொகை எப்போது தங்களின் வங்கிக் கணக்கிற்கு வரும் என்ற மிகப்பெரிய எதிர்பார்ப்பு எழுந்துள்ளது.
இந்நிலையில், கடந்த மே 15ஆம் தேதி வழக்கம்போல பெண்களின் கணக்கில் ரூ.1,000 மட்டுமே வரவு வைக்கப்பட்டது மக்கள் மத்தியிலும், எதிர்க்கட்சிகள் மத்தியிலும் விவாதத்தைக் கிளப்பியது. வாக்குறுதி அளித்தபடி ஏன் ரூ.2,500 வழங்கப்படவில்லை என்ற கேள்விக்கு, முதலமைச்சர் அலுவலகம் (CMO) தரப்பில் விளக்கம் அளிக்கப்பட்டுள்ளது. தற்போதைய நிலையில் இத்திட்டத்தை முழுமையாக மறுசீரமைப்பு (Restructuring) செய்ய வேண்டியுள்ளதால், அதற்கு கூடுதல் கால அவகாசம் தேவைப்படுகிறது என்றும், அதுவரை பழைய நடைமுறையின்படியே ரூ.1,000 தொடர்ந்து வழங்கப்படும் என்றும் தெரிவிக்கப்பட்டுள்ளது. இந்த நிர்வாக நடைமுறைகள் காரணமாக, அடுத்த இரண்டு மாதங்களுக்குள் இந்தத் தொகை உயர்வு சாத்தியமில்லை என்றே கள நிலவரங்கள் காட்டுகின்றன.
இத்தொகை உயர்வு தாமதமாவதற்கு முக்கியக் காரணம், புதிய பயனாளிகள் கணக்கெடுப்பும் நிர்வாகப் பணிகளும் இன்னும் தொடங்கப்படாததே ஆகும். தமிழகத்தில் தற்போது சுமார் 1.15 கோடிக்கும் அதிகமான பெண்கள் இந்த திட்டத்தின் மூலம் பயனடைந்து வரும் நிலையில், தவெக அரசு தனது வாக்குறுதியில் ‘அனைத்து பெண்களுக்கும்’ இத்தொகை வழங்கப்படும் என்று கூறியிருந்தது. இதற்காக விடுபட்ட கோடிக்கணக்கான பெண்களை இத்திட்டத்திற்குள் கொண்டு வர புதிய பயனாளிகள் கணக்கெடுப்போ, தகுதி வரம்புகளை மறுவரையறை செய்வதற்கான பூர்வாங்கப் பணிகளோ இன்னும் வேகம் எடுக்கவில்லை. புதிய விண்ணப்பங்களுக்கான மென்பொருள் (Software) உருவாக்குவது, தரவு சேகரிப்பு போன்ற ஆரம்பகட்ட நிருவாகப் பணிகளை முடிக்கவே குறைந்தது சில மாதங்கள் தேவைப்படும். மேலும், இத்திட்டத்தை ரூ.2,500 ஆக உயர்த்தும் போது மாநில அரசுக்கு ஏற்படும் கூடுதல் நிதிச்சுமையைத் திட்டமிட்டு, பட்ஜெட்டில் திருத்தங்கள் கொண்டு வரவும் நிருவாக ரீதியாகப் பல வழிமுறைகள் உள்ளன.
இதற்கிடையே, தேர்தல் வாக்குறுதிகளை நிறைவேற்றாமல் தவெக அரசு காலங்கடத்துவதாக திமுக உள்ளிட்ட எதிர்க்கட்சிகள் விமர்சிக்கத் தொடங்கியுள்ளன. “ஏற்கனவே நடைமுறையில் இருக்கும் ஒரு திட்டத்திற்கு கூடுதல் நிதி வழங்குவதில் என்ன மறுசீரமைப்பு வேண்டி கிடக்கிறது?” என்று அவை கேள்வி எழுப்பியுள்ளன. மறுசீரமைப்பு குறித்த விரிவான அறிவிப்பை இந்த மே மாத இறுதிக்குள் முதலமைச்சர் விஜய் வெளியிடுவார் என்று தலைமைச் செயலக வட்டாரங்கள் கூறினாலும், கள அளவில் கணக்கெடுப்பும் புதிய பயனாளிகள் சேர்க்கையும் முழுமையடையாமல் ரூ.2,500 கைக்கு வருவது தற்போதைக்குக் கடினமே. சுருக்கமாகச் சொன்னால், நிதி மேலாண்மை மற்றும் முறையான தகுதிப் பட்டியல் தயாரிப்பு எனப் பல கட்டங்களைத் தாண்ட வேண்டியுள்ளதால், ‘மதிப்புமிகு மகளிர் திட்டம்’ முழு வடிவம் பெற்று, வாக்குறுதி அளிக்கப்பட்ட ரூ.2,500 பெண்கள் கைகளில் கிடைக்க அடுத்த 2 முதல் 3 மாதங்கள் வரை ஆகலாம் என்பதே தற்போதைய நிலவரம்!